Advertising on the Telegram channel «Amharic Spritual Books»

#ሁልጊዜ_በእግዚአብሔር_ደህና_ሆኖ_መኖር! በመንፈስ ቅዱስ፣ በእግዚአብሔር ጸጋ ተጠብቆ መኖር፣ ከመንፈሳዊ ድርቅ ራስን መሸሸግ፣ ዘወትር በእግዚአብሔር ጸጋ ላይ በመደገፍ ሁለንተናን ማበርታት፣ እግዚአብሔር ሰፈር በመዋል ለእግዚአብሔር መብዛት፣ መንፈሳዊነትን በሚናጠቅ በዚህ ዓለም ላይ እየኖሩ ዘወትር በእግዚአብሔር ደህና፣ ጤነኛ መሆን ከእኛ ይጠበቃል። በወደቀው ዓለም፣ በክፉና በጠማማ ትውልድ መሃል ለእግዚአብሔር እንደ ከዋክብት ማብራት፣ የልጁን የኢየሱስን መልክ እንደ መስታወት እያንጸባረቁ መኖር የሚቻለው እግዚአብሔር ላይ የሙጥኝ በማለት፣ ዘወትር በህልውናው በመሞላት ነው። ጸጋ ይብዛልን!!

"በክርስቶስ ኢየሱስ ለመሆን የበቃችሁት ከእርሱ የተነሣ ነው፤ እርሱ ከእግዚአብሔር ዘንድ ጥበባችን፣ ጽድቃችንና ቅድስናችን፣ ቤዛችንም ሆኗል።"   1ቆሮ 1:30

#የነፍስ_መልሕቅ ከፊት ያለውን ተስፋ ለመያዝ ወደ እግዚአብሔር ለሸሸ ሰው የነፍስ መልሕቅ አለው፤ ተስፋውም እግዚአብሔር በራሱ የማለበት ጽኑ እና አስተማማኝ ተስፋ ነው። ከከንቱው ዓለም ወደ እግዚአብሔር ለሸሸ ሰው በነውጥ ውስጥ የሚያጸና ጽኑ ተስፋ አለው፣ የነፍስ መልሕቅ አለው። እግዚአብሔር የማይለወጥ ዐላማውን የተስፋው ቃል ወራሾች ለሆንነው ለእኛ በራሱ ምሎ ግልጽ አድርጓል፤ በዚህም ብርቱ መጽናናት አግኝተናል። የተገባልን ቃል ኪዳን፣ የተሰጠን የተስፋ ቃል ጽኑና አስተማማኝ መሆኑን የምናውቀው ከመጋረጃው በስተ ጀርባ ወዳለው ውስጠኛ መቅደስ ስለ እኛ ቀድሞ የገባውን፣ በዚያም እንደ መልከጼዴቅ ሹመት ለዘላለም ሊቀ ካህናት የሆነውን ኢየሱስን በማየት ነው። በነፍሳችን መልሕቅ ከነውጥ ተጠብቀን፣ አይኖቻችንን ጽኑና አስተማማኝ በሆነው ተስፋችን ላይ ተክለን መኖር ይሁንልን!! ዕብራውያን 6 (አዲሱ መ.ት) ¯¯¯¯¯¯¯¯¯¯ ¹⁶ ሰዎች ከእነርሱ በሚበልጥ ይምላሉ፤ መሐላውም የተባለውን ነገር ስለሚያጸና፣ በመካከላቸው የተነሣው ክርክር ሁሉ ይወገዳል። ¹⁷ እግዚአብሔር የማይለወጥ ዐላማውን ለተስፋው ቃል ወራሾች ግልጽ ለማድረግ ስለ ፈለገ፣ በመሐላ አጸናው፤ ¹⁸ እግዚአብሔር ከቶ ሊዋሽ አይችልም፤ እርሱ በሁለት በማይለወጡ ነገሮች በፊታችን ያለውን ተስፋ ለመያዝ ወደ እርሱ ለሸሸን ለእኛ ብርቱ መጽናናት እንድናገኝ አድርጎአል። ¹⁹ እኛም የነፍስ መልሕቅ የሆነ ጽኑና አስተማማኝ ተስፋ አለን፤ ይህም ተስፋ ከመጋረጃው በስተ ጀርባ ወዳለው ውስጠኛ መቅደስ ይገባል። ²⁰ ይህም ስፍራ ኢየሱስ ስለ እኛ ቀድሞ የገባበት ነው። እርሱም እንደ መልከጼዴቅ ሹመት ለዘላለም ሊቀ ካህናት ሆኖአል።

ፈጥኖ መብቀል ላለመጠውለግና ላለመድረቅ ዋስትና አይሆንም። ፈጥኖ መብቀል ሥር መስደድ ካልታከለበት ዋስትና የለውም። ምክንያቱም በፀሐይ በተመቱ ጊዜ ሳይጠወልጉ፣ ሳይደርቁ ጸንተው የሚቆሙት ስስ ዐፈር ስላለው ፈጥኖ ለመብቀል በሚያመቸው ድንጋያማ መሬት ላይ የተተከሉት ሳይሆኑ በመልካም መሬት ላይ ተተክለው፣ ሥር የሰደዱትና የጸኑት ናቸው። የእግዚአብሔርን ቃል በደስታ ሰምተን በፍጥነት እንደምንቀበለው ሁሉ በደስታ እንጽናበት፣ ሥር እንስደድበት፣ ፍሬ እናፍራበት። ማቴዎስ 13 (አዲሱ መ.ት) ¯¯¯¯¯¯¯¯¯¯ ⁵ አንዳንዱ ዘር ዐፈሩ ስስ በሆነ፣ ድንጋያማ መሬት ላይ ወደቀ፤ ዐፈሩ ስስ ስለ ሆነም ፈጥኖ በቀለ። ⁶ ነገር ግን ፀሓይ ሲመታው ጠወለገ፤ ሥር ባለ መስደዱም ደረቀ። … ²⁰ በድንጋያማ መሬት ላይ የተዘራው፣ ቃሉን ሰምቶ ወዲያውኑ በደስታ የሚቀበለውን ሰው ይመስላል። ²¹ ነገር ግን ሥር መስደድ ባለመቻሉ ብዙ አይቈይም፤ በቃሉ ምክንያት መከራ ወይም ስደት ሲመጣ ወዲያውኑ ይሰናከላል።

«ከወንጌሉ የሚመችህን ብቻ መርጠህ እያመንክ የማይመችህን ገለል የምታደርግ ከሆንክ፣ እያመንክ ያለኸው በወንጌሉ ሳይሆን በራስህ ነው።» ቅዱስ አውገስጢኖስ