မြဝတီသတင်း

📰 လယ်ယာသုံးစက်ကိရိယာများ အတွက် စက်သုံးဆီ ရောင်းချရာတွင် မြို့နယ်စိုက်ပျိုးရေးကြီးကြပ်မှုကော်မတီ၏ ထောက်ခံချက်ပါမှသာ ရောင်းချပေးရန် ဆီဆိုင်များကို ညွှန်ကြား

📅 April 5, 2026 at 05:39 AM

ရန်ကုန်၊ ဧပြီ ၅

မြန်မာနိုင်ငံတစ်ဝန်း စိုက်ပျိုးရေးရာသီအတွက် လယ်ယာသုံးစက်ကိရိယာများ၏ စက်သုံးဆီ ရောင်းချရာတွင် မြို့နယ်စိုက်ပျိုးရေးကြီးကြပ်မှုကော်မတီ၏ ထောက်ခံချက်ပါမှသာ ရောင်းချပေးရန် ဆီဆိုင်များကို ညွှန်ကြားထားကြောင်း စက်သုံးဆီဖြန့်ဖြူးရောင်းချရေးအသင်းမှ တာဝန်ရှိသူတစ်ဦးက ရန်ကုန်ခေတ်သစ်သတင်းဌာနထံသို့ ပြောဆိုသည်။

ယခု ဧပြီလဆန်းပိုင်းအတွင်း ထွက်ရှိလာသော စစ်တပ်၏ ညွှန်ကြားစာတွင် လယ်ယာကုန်ထုတ်လုပ်ငန်းများအတွက် စက်သုံးဆီများ စနစ်တကျဖြန့်ဖြူးနိုင်ရေး လယ်ယာသုံးထွန်စက်များနှင့် ရေတင်စက်များအတွက် ဆီရောင်းချပေးရာတွင် သက်ဆိုင်ရာ မြို့နယ်စိုက်ပျိုးရေးကြီးကြပ်မှုကော်မတီ၏ ထောက်ခံချက်နှင့် မှတ်ပုံတင်စာအုပ်များ ပါရှိမှသာ ရောင်းချပေးရန် စက်သုံးဆီအရောင်းဆိုင်များသို့ ညွှန်ကြားလိုက်ခြင်းဖြစ်သည်ဟု သိရှိရသည်။

စက်သုံးဆီဝယ်ယူခွင့် ထောက်ခံချက်တွင် အမှန်တကယ် စိုက်ပျိုးလုပ်ကိုင်နေသည့် ကျေးရွာ၊ ကွင်းအမှတ်၊ တောင်သူအမည်နှင့် စိုက်ဧကအပြင် တစ်ရက်ထွန်ယက်နိုင်မှုနှုန်းနှင့် ရေတင်ရန် အမှန်တကယ်လိုအပ်မည့် ဆီပမာဏ (ဂါလန်) တို့ကို တိကျစွာ ဖော်ပြရမည်ဖြစ်ကြောင်း၊ ထို့အပြင် ဝယ်ယူမည့် စက်သုံးဆီဆိုင်အမည်ကိုပါ တစ်ပါတည်း ဖော်ပြပါရှိရမည် ဖြစ်ကြောင်း သိရှိရသည်။

စက်သုံးဆီအရောင်းဆိုင်များအနေဖြင့်လည်း ဆီရောင်းချရာတွင် လိုက်နာရမည့် စည်းကမ်းချက်များကို ထုတ်ပြန်ထားရာ အခြားသုံးလယ်ဂျာစာရင်းတွင် မဖြစ်မနေစာရင်းသွင်းရန်နှင့် ထွန်စက်တစ်စီးချင်း၊ ရေတင်ပန့်တစ်လုံးချင်းအလိုက် မှတ်ပုံတင်စာအုပ်များ ပြုလုပ်ထားရှိရန် စစ်တပ်၏ ညွှန်ကြားချက်တွင် ဖော်ပြထားသည်။

ယင်းအပြင် အရောင်းဆိုင်များအနေဖြင့် နေ့စဉ်ရောင်းချမှု အခြေအနေများကို သက်ဆိုင်ရာ လယ်ယာသုံးဂရု (Group) များတွင် နေ့စဉ်မပြတ် တင်ပြသွားရမည် ဖြစ်သည်ဟု သိရှိရသည်။

စစ်တပ်၏ ညွှန်ကြားချက်ကြောင့် တောင်သူများအနေဖြင့် စိုက်ပျိုးရေး လုပ်ငန်းခွင်အတွက် စက်သုံးဆီ ရှုရှိရန် အခက်အခဲများဖြစ်နေကြကြောင်း၊ ဒီဇယ်ဆီရရှိရေးအတွက် အဆင့်ဆင့် ဖြတ်သန်းလုပ်ဆောင်နေရသဖြင့် လုပ်ငန်းများ နှောင့်နှေးနေကြောင်း သိရှိရသည်။

ဒီဇယ်က လိုသလောက်မရဘူး။ စျေးကလည်း တက်နေတော့။ ဘယ်လိုမှကို စိုက်ပျိုးရေးအတွက် စိုက်ထုတ်မလုပ်နိုင်တော့ဘူး။ ပြင်ပစျေးကွက်မှာလည်း ဒီဇယ်တစ်ပါတီကို သိန်းအစိတ် (ငွေကျပ် ၂၅ သိန်း) လောက်အထိကို တက်နေတာ ဟု ပဲခူးတိုင်း၊ သနပ်ပင်မြို့နယ်၊ လယ်ဧက ၁၀၀ နီးပါးပိုင်ဆိုင်သော တောင်သူတစ်ဦးက ရှင်းပြသည်။

စစ်တပ်က စက်သုံးဆီများကို လုံလောက်စွာ မပေးနိုင်တော့သဖြင့် ပုံစံအမျိုးမျိုး စည်းကမ်းအမျိုးမျိုးဖြင့် တင်းကျပ်မှုများကို လုပ်ဆောင်လာကြောင်း စက်သုံးဆီအသိုင်းအ၀ိုင်းထံမှ သိရှိရသည်။

ဓာတ်ပုံ-မွန်ပြည်နယ်၊ပေါင်မြို့နယ်မှာ စက်သုံးဆီဝယ်ယူရန် ​တောင်သူ​များက ​ရေတင်စက်​များကို ဆီဆိုင်အထိ ယူဆောင်လာ၍ တန်းစီးနေရစဉ်။

Photo- ​နေ့သစ်

The post လယ်ယာသုံးစက်ကိရိယာများ အတွက် စက်သုံးဆီ ရောင်းချရာတွင် မြို့နယ်စိုက်ပျိုးရေးကြီးကြပ်မှုကော်မတီ၏ ထောက်ခံချက်ပါမှသာ ရောင်းချပေးရန် ဆီဆိုင်များကို ညွှန်ကြား appeared first on Khit Thit Media.

🔗 ဖတ်ရန်: https://yktnews.com/2026/04/246887/
📌 Khit Thit Media

📰 သိမ်ဆိပ်တိုက်နယ်ဆေးရုံ ဆရာဝန် ဒေါက်တာသက်ထူးအေးအောင်၏ မှားယွင်းဆေးထိုးမှုကြောင့် အသက် ၄ နှစ်အရွယ် မောင်ဖုန်းမြတ်ကို သေဆုံး၊ ဆေးမှတ်တမ်းမပေးဘဲ တိုင်ချင်ရာတိုင်ဟု ဆရာဝန်က စိန်ခေါ်

📅 April 5, 2026 at 05:47 AM

ရန်ကုန်၊ ဧပြီ ၅

မွန်ပြည်နယ်၊ သထုံမြို့နယ်၊ သိမ်ဆိပ်တိုက်နယ်ဆေးရုံတွင် တာဝန်ကျဆရာဝန် ဒေါကတာသက်ထူးအေးအောင်၏ ပေါ့ဆစွာ ဆေးကုသမှုကြောင့် အသက် ၄ နှစ်အရွယ် ကလေးငယ်တစ်ဦး မိနစ်ပိုင်းအတွင်း အသက်ဆုံးရှုံးခဲ့ရသည့် ဖြစ်စဉ်တစ်ခု မတ်လကုန်ပိုင်းက ဖြစ်ပွားခဲ့ပြီး အဆိုပါကိစ္စနှင့် ပတ်သက်၍ တာဝန်ရှိသူများက စုံစမ်းစစ်ဆေးပေးရန် မိသားစုဝင်များက တရားမျှတမှု တောင်းဆိုနေကြသည်။

မတ်လ ၂၉ ရက်နေ့က ကလိကျွန်းကျေးရွာတွင် နေထိုင်သည့် အသက် ၄ နှစ်အရွယ် မောင်ဖုန်းမြတ်ကိုသည် ဝမ်းအနည်းငယ်သွားသဖြင့် သိမ်ဆိပ်တိုက်နယ်ဆေးရုံသို့ သွားရောက်ပြသခဲ့သည်။

ဆေးရုံတွင် တာဝန်ကျဆရာဝန် ဒေါက်တာသက်ထူးအေးအောင်က ပိုးသတ်ဆေးထိုးရန် ညွှန်ကြားခဲ့ရာ၌ ကလေးငယ်မှာ ဆေးမတည့်သည့် လက္ခဏာများ မိနစ်ပိုင်းအတွင်း ပြလာပြီးနောက် အသက်ဆုံးရှုံးသွားခဲ့ခြင်းဖြစ်သည်။

ကလေးငယ်၏ မိသားစုဝင်များက ဆရာဝန်၏ ကုသမှုအပေါ် ဆေးမတည့်မှုစစ်ဆေးခြင်း (Skin Test) မပြုလုပ်ခြင်း၊ ပြင်းထန်ပိုးသတ်ဆေးများ ထိုးနှံရာတွင် ဆေးနှင့် တည့်၊ မတည့်ကို အရေပြားပေါ်တွင် ကြိုတင်စမ်းသပ်ရမည် ဖြစ်သော်လည်း ဆရာဝန်က ယင်းသို့ပြုလုပ်ခြင်းမရှိဘဲ အတင်းအဓမ္မ ထိုးနှံခဲ့ကြောင်း ပြောဆိုသည်။

ကလေးငယ် အခြေအနေဆိုးရွားနေချိန်တွင် ဆရာဝန်က နောက်ခါဆို ငါမလုပ်ပေးတော့ဘူး ဟု ပြောဆိုခဲ့သည့်အပြင်၊ ကလေးငယ်သေဆုံးမှုအတွက် သွားရောက်မေးမြန်းရာတွင်လည်း ဆေးမှတ်တမ်းမပေးနိုင်ကြောင်းနှင့် အမှုဖွင့်ချင်ဖွင့်၊ တရားစွဲချင်စွဲ၊ ကြိုက်သလိုတိုင် ဟု တာဝန်မဲ့စွာ တုံ့ပြန်ခဲ့သည်။

ကလေးငယ် သေဆုံးသွားပြီးနောက် မည်သည့်ဆေးအမျိုးအစား ထိုးခဲ့သည်၊ မည်သည့်အကြောင်းကြောင့် သေဆုံးသည်ဟူသော ဆေးဘက်ဆိုင်ရာ မှတ်တမ်း (Medical Record) များကို မိသားစုထံ ပေးအပ်ခြင်းမရှိဘဲ လက်မှတ်တစ်ခုသာ အတင်းထိုးခိုင်းကာ အလောင်းကို ထုတ်ပေးခဲ့ကြောင်း သိရှိရသည်။

ကွယ်လွန်သူ မောင်ဖုန်းမြတ်ကို၏ ကြွင်းကျန်ရစ်သော ရုပ်ကလာပ်ကို မတ်လ ၃၀ ရက်နေ့ နံနက်ပိုင်းတွင် မိုးကောင်း (RESCUE) လူမှုကယ်ဆယ်ရေးအသင်း၏ ကူညီမှုဖြင့် ကလိကျွန်းသုဿန်သို့ ပို့ဆောင်သင်္ဂြိုဟ်ခဲ့သည်။

ယခုဖြစ်စဉ်နှင့် ပတ်သက်၍ ကလေးငယ်အတွက် တရားမျှတမှုရရှိရန်နှင့် အလားတူ ဖြစ်ရပ်မျိုး ထပ်မံမဖြစ်ပွားစေရန်အတွက် တာဝန်မဲ့သော သိမ်ဆိပ်တိုက်နယ်ဆေးရုံမှ ဆရာဝန်ဒေါက်တာသက်ထူးအေးအောင်အား ထိရောက်စွာ စုံစမ်းစစ်ဆေး အရေးယူပေးရန် မိသားစုဝင်များက တောင်းဆိုသည်။

The post သိမ်ဆိပ်တိုက်နယ်ဆေးရုံ ဆရာဝန် ဒေါက်တာသက်ထူးအေးအောင်၏ မှားယွင်းဆေးထိုးမှုကြောင့် အသက် ၄ နှစ်အရွယ် မောင်ဖုန်းမြတ်ကို သေဆုံး၊ ဆေးမှတ်တမ်းမပေးဘဲ တိုင်ချင်ရာတိုင်ဟု ဆရာဝန်က စိန်ခေါ် appeared first on Khit Thit Media.

🔗 ဖတ်ရန်: https://yktnews.com/2026/04/246891/
📌 Khit Thit Media

📰 ဒီပဲယင်းတွင် လေကြောင်းအန္တရာယ် စိုးရိမ်ရသဖြင့် သင်္ကြန်ပွဲများ ကန့်သတ်ချက်ထုတ်ပြန်၊ အရာတော်တွင် စစ်တပ်က လေကြောင်းတိုက်ခိုက်

📅 April 5, 2026 at 05:58 AM

ရန်ကုန်၊ ဧပြီ ၅

မြန်မာနိုင်ငံအထက်ပိုင်း စစ်ကိုင်းတိုင်းအတွင်းရှိ မြို့နယ်များတွင် စစ်ကောင်စီတပ်၏ လေကြောင်းမှ ရမ်းသမ်းတိုက်ခိုက်မှုများ ဆက်တိုက်ဖြစ်ပွားနေသဖြင့် လာမည့်အတာသင်္ကြန်ကာလတွင် လူစုလူဝေးပွဲလမ်းသဘင်များ မပြုလုပ်ကြရန်နှင့် လေကြောင်းရန်ကို အထူးသတိပြုကြရန် ဒေသအုပ်ချုပ်ရေးအဖွဲ့များက သတိပေးချက်များ ထုတ်ပြန်ထားသည်။

ဒီပဲယင်းမြို့နယ် ပြည်သူ့အုပ်ချုပ်ရေးအဖွဲ့ (ပအဖ) က သင်္ကြန်ကာလအတွင်း ဘာသာရေးနှင့် ဓလေ့ထုံးတမ်းဆိုင်ရာ အခမ်းအနားများကို သက်ဆိုင်ရာ ရပ်ကျေး ပအဖ၊ ပကဖ၊ ပလဖ အဖွဲ့များနှင့် ကြိုတင်ညှိနှိုင်းပြီး ဘေးကင်းလုံခြုံရေး အစီအမံများဖြင့်သာ ဆောင်ရွက်ကြရန် တိုက်တွန်းထားသည်။

စစ်ကောင်စီတပ်သည် စာသင်ကျောင်း၊ ဘုန်းကြီးကျောင်းနှင့် အလှူမင်္ဂလာပွဲများပါမကျန် လေကြောင်းမှ ပစ်မှတ်ထားတိုက်ခိုက်နေခြင်းကြောင့် ပြည်သူများအနေဖြင့် လုံခြုံရေးအသိ၊ သတိဖြင့် ဖြတ်သန်းကြရန် နှိုးဆော်ထားခြင်းဖြစ်သည်။

အလားတူ ယနေ့ (ဧပြီလ ၅ ရက်) နံနက် ၁၂ နာရီ ၃၀ မိနစ်ခန့်တွင် အရာတော်မြို့နယ် အနောက်မြောက်ခြမ်းရှိ တောတွင်းတစ်နေရာကို တံတားဦးလေတပ်မှ တက်လာသော ဂျက်ဖိုက်တာ (Jet Fighter) နှစ်စီးဖြင့် စစ်ကောင်စီတပ်က တိုက်ပွဲဖြစ်ပွားခြင်းမရှိဘဲ ဗုံးကျဲတိုက်ခိုက်ခဲ့သည်။

အဆိုပါ တိုက်ခိုက်မှုကြောင့် တောထဲရှိ ကွမ်းခြံရေပေးဝေသည့် ဆိုလာပြားများနှင့် တဲတစ်လုံး ပျက်စီးသွားခဲ့သော်လည်း ကံကောင်းထောက်မစွာဖြင့် ပြည်သူများ ထိခိုက်ဒဏ်ရာရမှု မရှိခဲ့ကြောင်း Knight Commanders အဖွဲ့မှ သိရသည်။

စစ်ခွေးတွေက တိုက်ပွဲဖြစ်ပွားခြင်းမရှိဘဲ လေကြောင်းတိုက်ခိုက်ခဲ့တာပါ။ ပြည်သူတွေ ထိခိုက်ဒဏ်ရာရတာမျိုး မရှိပါဘူး။ တောထဲမှာ ရှိတဲ့ ကွမ်းခြံကို ရေပေးတဲ့ ဆိုလာပြားနှင့် တဲများ ပျက်စီးသွားတယ်။ ပြည်သူများအနေဖြင့် လေကြောင်းနှင့် စစ်ကြောင်း အန္တရာယ်တို့ကို သတိပြုနေထိုင်ချဖို့ ပြောချင်ပါတယ်ဟု Knight Commanders အဖွဲ့မှ တာဝန်ရှိသူကပြောဆိုသည်။

အရာတော်မြို့နယ်အတွင်း ပြီးခဲ့သည့် ဇန်နဝါရီလကလည်း မူကြိုကျောင်းတစ်ကျောင်း ဗုံးကျဲခံရမှုကြောင့် ကလေးငယ်တစ်ဦးအပါအဝင် ပြည်သူနှစ်ဦး သေဆုံးခဲ့သည့် သာဓကများ ရှိခဲ့သည်။

ထို့ကြောင့် တော်လှန်ရေးအင်အားစုများက ပြည်သူများအနေဖြင့် လေကြောင်းသတင်းကို အမြဲနားစွင့်နေကြရန်နှင့် ဗုံးခိုကျင်းများ စနစ်တကျ တူးထားကြရန် အလေးအနက် တိုက်တွန်းထားပါသည်။

လက်ရှိတွင် စစ်ကောင်စီသည် မြေပြင်စစ်ကြောင်းများအပြင် ဝေဟင်မှပါ အရပ်သားပြည်သူများကို ပစ်မှတ်ထား တိုက်ခိုက်နေမှုများ လျော့ပါးသွားခြင်းမရှိသည့်အတွက် ယခုနှစ် အတာသင်္ကြန်ကို ပျော်ပွဲရွှင်ပွဲများထက် ဘေးကင်းလုံခြုံရေးကိုသာ ပထမဦးစားပေးအဖြစ် ထားရှိကြရန် ဒေသခံအုပ်ချုပ်ရေးအဖွဲ့များက နှိုးဆော်ထားခြင်း ဖြစ်သည်။

ဓာတ်ပုံ- စစ်ကိုင်းတိုင်း၊ ခင်ဦးမြို့နယ်တွင် ၂၀၂၅ ခုနှစ် ဒီဇင်ဘာလအတွင်း စစ်တပ်၏ လေကြောင်းတိုက်ခိုက်မှုကြောင့် မီးလောင်ပျက်စီးမှုများကို တွေ့ရစဉ်။

The post ဒီပဲယင်းတွင် လေကြောင်းအန္တရာယ် စိုးရိမ်ရသဖြင့် သင်္ကြန်ပွဲများ ကန့်သတ်ချက်ထုတ်ပြန်၊ အရာတော်တွင် စစ်တပ်က လေကြောင်းတိုက်ခိုက် appeared first on Khit Thit Media.

🔗 ဖတ်ရန်: https://yktnews.com/2026/04/246896/
📌 Khit Thit Media

📰 မြို့သစ်နှင့် နတ်မောက် မြို့နယ် အစပ်ကို စစ်ကြောင်းထိုးနေသည့် စစ်တပ်ကို တိုက်ခိုက်မှု စစ်သားများ ထိခိုက်သေဆုံးမှုများပြားပြီး တိုက်ပွဲများ ဆက်လက်ဖြစ်ပွားနေ

📅 April 5, 2026 at 06:01 AM

ရန်ကုန်၊ ဧပြီ ၅

မကွေးတိုင်း၊ မြို့သစ်နှင့် နတ်မောက် မြို့နယ် အစပ်ကို စစ်ကြောင်းထိုးနေသည့် အကြမ်းဖက် စစ်တပ်ကို တိုက်ခိုက်ရာ စစ်သားများ ထိခိုက်သေဆုံးမှုများပြားပြီး တိုက်ပွဲများ ဆက်လက်ဖြစ်ပွားနေကြောင်း နတ်မောက်မြို့နယ် ပကဖ က ပြောဆိုသည်။

ဧပြီလ ၁ ရက်နေ့တွင် အကြမ်းဖက် စစ်တပ်၏ ကပစ-၁၇ မှ ထွက်လာသော စစ်ကြောင်းသည် မြို့သစ်မြို့နယ်နှင့် နတ်မောက်မြို့နယ် အကြားရောက်ရှိလာစဉ် တော်လှန်ရေးတပ်ဖွဲ့များက ကြားဖြတ် တိုက်ခိုက်ခဲ့ကြောင်း သိရသည်။

ထိုတိုက်ခိုက်မှု အတွင်း တော်လှန်ရေးတပ်ဖွဲ့များက လက်ဦးမှုရယူကာ စတင် တိုက်ခိုက်နိုင်ခဲ့သောကြောင့် အကြမ်းဖက် စစ်သား ၁၅ ဦးသေဆုံးသည်ကို မျက်မြင်တွေ့မြင်ခဲ့ရပြီး ထိခိုက်ဒဏ်ရာရရှိသူများလည်းရှိကြောင်း သိရှိရသည်။

ယင်း အကြမ်းဖက် စစ်တပ် စစ်ကြောင်းသည် နတ်မောက်မြို့နယ်အတွင်း ဆက်လက် စစ်ကြောင်းထိုးနေသည့်အတွက် တော်လှန်ရေးတပ်ဖွဲ့များက ဆက်လက် ခုခံတိုက်ခိုက်နေကာ ကျေးရွာများ တဝိုက်တွင် ထိတွေ့တိုက်ပွဲငယ်များ ဆက်လက်ဖြစ်ပွားလျက်ရှိကြောင်း သိရသည်။

အဆိုပါ တိုက်ခိုက်မှုကို နတ်မောက်မြို့နယ် ပကဖ ပြည်သူ့ကာကွယ်ရေး‌တပ်ဖွဲ့နှင့် မဟာမိတ်တပ်ဖွဲ့များက ပူးပေါင်း လုပ်ဆောင်ခဲ့ခြင်းဖြစ်ကြောင်း၊ ပြည်သူများအနေနှင့် စစ်ဆင်ရေးကာလအတွင်း စစ်ရေးသတိ၊ စစ်ရေးအသိဖြင့် တိုက်ပွဲဖြစ်ပွားရာ ဧရိယာတစ်ဝိုက်နှင့် ဆက်စပ်ဒေသများတွင် မိုင်းအန္တရာယ်၊ လက်နက်ကြီးအန္တရာယ်နှင့် လေကြောင်းအန္တရာယ်များကို အထူးဂရုပြု၍ သွားလာလှုပ်ရှားနေထိုင်ကြပါရန်နှင့် တိုက်ပွဲ သတင်း အသေးစိတ်ကို မကြာမှီဆက်လက်ထုတ်ပြန်ပေးသွားမည် ဖြစ်ကြောင်း နတ်မောက်မြို့နယ် ပြည်သူ့ကာကွယ်ရေးတပ်ဖွဲ့က ပြောဆိုထားသည်။

The post မြို့သစ်နှင့် နတ်မောက် မြို့နယ် အစပ်ကို စစ်ကြောင်းထိုးနေသည့် စစ်တပ်ကို တိုက်ခိုက်မှု စစ်သားများ ထိခိုက်သေဆုံးမှုများပြားပြီး တိုက်ပွဲများ ဆက်လက်ဖြစ်ပွားနေ appeared first on Khit Thit Media.

🔗 ဖတ်ရန်: https://yktnews.com/2026/04/246902/
📌 Khit Thit Media

📰 သံဖြူဇရပ်-မုဒုံ လမ်းပိုင်းတွင် တိုက်ပွဲဖြစ်ပွားပြီး စစ်တပ် ပစ်ခတ်သော ကျည်ထိမှန်၍ ပြည်သူ ၁ ဦး သေဆုံး

📅 April 5, 2026 at 06:02 AM

ရန်ကုန်၊ ဧပြီ ၅

မွန်ပြည်နယ်၊ မုဒုံမြို့နယ်၊ သံဖြူဇရပ်-မုဒုံ လမ်းပိုင်းတွင် တိုက်ပွဲဖြစ်ပွားပြီး အကြမ်းဖက် စစ်တပ် ပစ်ခတ်သော ကျည်ထိမှန်၍ ပြည်သူ ၁ ဦး သေဆုံးခဲ့ကြောင်း ခရီးသွားပြည်သူများက ရန်ကုန်ခေတ်သစ် သတင်းဌာနထံသို့ ပြောဆိုသည်။

ဧပြီလ ၄ ရက်နေ့ ညနေ ၄ နာရီခန့်တွင် မုဒုံမြို့နယ်၊ သံဖြူဇရပ်-မုဒုံ လမ်းပိုင်းရှိ ကွမ်လှာရွာနှင့် ရောင်းဒေါင်းရွာအကြားတွင် အကြမ်းဖက် စစ်တပ်နှင့် တော်လှန်ရေး တပ်ဖွဲ့များ ထိတွေ့ တိုက်ပွဲ ၁ နာရီနီးပါးခန့် ဖြစ်ပွားခဲ့ကြောင်း သိရသည်။

ထိုထိတွေ့ တိုက်ပွဲအတွင်း အကြမ်းဖက် စစ်တပ်ဘက်မှ ထိခိုက်သေဆုံးမှုရှိသောကြောင့် လက်နက်ငယ်များဖြင့် ရမ်းသမ်းပစ်ခတ်ခဲ့ကြောင်း၊ ထိုသို့ ပစ်ခတ်မှုအတွင်း ကုန်ကားမောင်းသူ အမျိုးသား ၁ ဦး ကျည်ထိမှန်ကာ ပွဲချင်ပြီးသေဆုံးခဲ့ကြောင်း သိရှိရသည်။

ရောင်းဒါးရွာနားမှာ မနေ့က ညနေပိုင်းမှာ တိုက်ပွဲဖြစ်တာ ၁ နာရီနီးပါးလောက်ကြာတယ်။ တိုက်ပွဲစဖြစ်တည်းက လမ်းပိုင်းက ပိတ်သွားလို့ ခေတ္တစောင့်ဆိုင်းလိုက်ရသေးတယ်။ လမ်းပြန်ဖွင့်တဲ့ အချိန်မှာ တွေ့ခဲ့တာက စစ်ခွေး ၂ ကောင် စစ်ကားပေါ်မှာ မှောက်နေတာမြင်တယ်။ နောက်ပြီး စစ်ခွေးတွေ ရမ်းပစ်လို့ ယာဉ်မောင်း အမျိုးသား ၁ ဦးလည်း ပွဲချင်းပြီးသေဆုံးတယ်။ လမ်းပိုင်းပိတ်တာက ခဏလောက်ပါပဲ တိုက်ပွဲပြီးတာနဲ့ ပြန်ပွင့်သွားတယ် ဟု ခရီးသွားပြည်သူတစ်ဦးက ပြောဆိုသည်။

Add Post

အဆိုပါ တိုက်ပွဲမှုအား မည်သည့် လက်နက်ကိုင် တော်လှန်ရေးတပ်ဖွဲ့က လုပ်ဆောင်သည်ကို မသိရှိရသေးဘဲ တိုက်ပွဲ ဖြစ်စဉ် အသေးစိတ်ကို သိရှိနိုင်ရန် ရန်ကုန်ခေတ်သစ် သတင်းဌာနက ဒေသအခြေစိုက် တော်လှန်ရေးတပ်ဖွဲ့များကို ဆက်သွယ် မေးမြန်းလျက်ရှိသည်။

The post သံဖြူဇရပ်-မုဒုံ လမ်းပိုင်းတွင် တိုက်ပွဲဖြစ်ပွားပြီး စစ်တပ် ပစ်ခတ်သော ကျည်ထိမှန်၍ ပြည်သူ ၁ ဦး သေဆုံး appeared first on Khit Thit Media.

🔗 ဖတ်ရန်: https://yktnews.com/2026/04/246905/
📌 Khit Thit Media

📰 မြန်မာ့နိုင်ငံရေးအကျပ်အတည်းပြေလည်ရန် ဒေါ်အောင်ဆန်းစုကြည်နှင့် တွေ့ဆုံဆွေးနွေးမှုမပါဘဲ လမ်းစမရနိုင်ဟု NLD ပါတီ ထုတ်ပြန်

📅 April 5, 2026 at 11:35 AM

ရန်ကုန်၊ ဧပြီ ၅

မြန်မာနိုင်ငံတွင် စစ်အာဏာသိမ်းမှုကြောင့် ပေါ်ပေါက်လာသော ရှုပ်ထွေးသည့် နိုင်ငံရေးပြဿနာများကို ဖြေရှင်းရာတွင် လူထုခေါင်းဆောင် ဒေါ်အောင်ဆန်းစုကြည်နှင့် တွေ့ဆုံညှိနှိုင်းဆွေးနွေးမှုများ မရှိဘဲ မည်သို့မျှ ပြေလည်ရေးလမ်းစ ရရှိနိုင်မည်မဟုတ်ကြောင်း အမျိုးသားဒီမိုကရေစီအဖွဲ့ချုပ် (NLD) က သဘောထားထုတ်ပြန်ချက်တစ်ရပ် ယနေ့ ထုတ်ပြန်သည်။

လက်ရှိမြန်မာ့နိုင်ငံရေး၏ အဓိကသော့ချက်မှာ NLD ပါတီဥက္ကဋ္ဌ ဒေါ်အောင်ဆန်းစုကြည်ဖြစ်ပြီး သူမ၏ ပါဝင်ပတ်သက်မှုမရှိဘဲ ဆောင်ရွက်သည့် မည်သည့်ဖြေရှင်းနည်းမျိုးမဆို ထိရောက်သည့်ရလဒ် ထွက်ပေါ်လာမည်မဟုတ်ကြောင်း အလေးအနက် ဖော်ပြထားသည်။

“ယခင်ကတည်းက ထုတ်ပြန်ခဲ့တဲ့ အဖွဲ့ချုပ်သဘောထားပါ။ အဖွဲ့ ချုပ်ရဲ့သဘောထားကို နိုင်ငံတ ကာနဲ့ ပြည်သူလူထုအားလုံး သိစေလိုပါတယ်။ အခုလောလောဆယ် နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နဲ့ နိုင်ငံ တော်သမ္မတကြီး ဦးဝင်းမြင့်တို့လွတ်မြောက်ရေးလှုပ်ရှားမှုကတော့ ငြိမ်းချမ်းစွာနဲ့ နိုင်ငံရေးဖြစ်စဉ်ကို လိုလားသူတွေရဲ့ လှုပ်ရှားမှုလို့ မြင်ပါတယ်” ဟု စမ်းချောင်းမြို့နယ် အမျိုးသားဒီမိုကရေစီအဖွဲ့ချုပ် ဒုတိယဥက္ကဌ ဦးဘိုဘိုဦးက ရန်ကုန်ခေတ်သစ်သတင်းဌာနထံသို့ ပြောကြားသည်။

ပြီးခဲ့သည့် ဖေဖော်ဝါရီလ ၂၈ ရက်နေ့တွင် Zoom မှတဆင့် အမျိုးသားဒီမိုကရေစီအဖွဲ့ချုပ် ဒုတိယ ဗဟိုကော်မတီ၏ ကြားကာလ သတ္တမအကြိမ်အစည်း အဝေးတွင် စစ်အာဏာသိမ်းမှုကြောင့် ပေါ်ပေါက်လာသော မြန်မာ့နိုင်ငံရေးပြဿနာများကို ဖြေရှင်းရာတွင် အမျိုးသားဒီမိုကရေစီအဖွဲ့ချုပ် ဥက္ကဋ္ဌ ဒေါ်အောင်ဆန်းစုကြည်နှင့်တွေ့ဆုံဆွေးနွေးမှုမပါဝင်ဘဲ ပြေလည်ရေးလမ်းစရရှိနိုင်မည်မဟုတ်ဟု ယုံကြည်သောကြောင့် မတရားဖမ်းဆီး ခံထားရသော ဒေါ်အောင်ဆန်းစုကြည်အပါအဝင်နိုင်ငံရေး အကျဉ်းသားများအားလုံး ခြွင်းချက်မရှိ အမြန်ဆုံး လွတ်မြောက်ရေးကို စီမံချက်များရေးဆွဲဆောင်ရွက်ရန်သွားရန် အတည်ပြုဆုံးဖြတ်ခဲ့သည်။

မြန်မာနိုင်ငံအတွင်း ဖြစ်ပေါ်နေသည့် ပဋိပက္ခများ၊ လူမှုစီးပွားပျက်စီးမှုများနှင့် နိုင်ငံရေးမတည်ငြိမ်မှုများကို ရေရှည်တည်တံ့သော နည်းလမ်းဖြင့် ဖြေရှင်းနိုင်ရန်အတွက် လူထုက ယုံကြည်ကိုးစားသည့် ခေါင်းဆောင်များနှင့် ထိပ်သီးအဆင့် တွေ့ဆုံဆွေးနွေးမှုများ အရေးတကြီး လိုအပ်နေကြောင်း ပြည်တွင်း အခြေစိုက် နိုင်ငံရေးအင်အားစုများက သုံးသပ်ပြောဆိုသည်။

ပြည်သူလူထု၏ တစ်ခဲနက်ထောက်ခံမှုကို ရရှိထားသည့် ဒေါ်အောင်ဆန်းစုကြည်ကို နိုင်ငံရေးဖြစ်စဉ်များမှ ဖယ်ထုတ်ထားခြင်းသည် လက်ရှိအကျပ် အတည်းကို ပိုမိုဆိုးရွားစေရုံသာမကဘဲ ပြည်တွင်း၊ ပြည်ပက လိုလားနေသည့် ငြိမ်းချမ်းသော အဖြေရှာမှုကိုလည်း နှောင့်နှေးစေကြောင်း ပြည်တွင်း အခြေ စိုက် နိုင်ငံရေးအင်အားစုများက ဆက်လက်ပြောဆိုသည်။

နိုင်ငံတကာအသိုင်းအဝိုင်းအနေဖြင့်လည်း မြန်မာ့အရေးကို ဖြေရှင်းရာ၌ အနှစ်သာရရှိသော ဆွေးနွေးပွဲများ ပေါ်ပေါက်လာစေရန်နှင့် ဒေါ်အောင်ဆန်းစုကြည်အပါအဝင် နိုင်ငံရေးအကျဉ်းသားများ လွတ် မြောက်ရေးအတွက် ပိုမိုတက်ကြွစွာ ဝိုင်းဝန်းတွန်းအားပေးရန် ပြည်တွင်းနိုင်ငံရေးအင်အားစုက တောင်းဆိုထားသည်။

လက်ရှိတွင် ဒေါ်အောင်ဆန်းစုကြည်သည် နေပြည်တော်၌ ထိန်းသိမ်းခံထားရဆဲဖြစ်ပြီး သူမနှင့် တွေ့ဆုံခွင့်ရရှိရေးမှာ နိုင်ငံတကာသံတမန်များနှင့် အတိုက် အခံအင်အားစုများအကြား အဓိကတောင်းဆိုချက်တစ်ခု ဖြစ်နေဆဲဖြစ်သည်။

၂၀၂၁ ခုနှစ် ဖေဖော်ဝါရီလ ၁ ရက်နေ့တွင် အကြမ်းဖက် မင်းအောင်လှိုင်က ၂၀၂၀ ရွေးကောက်ပွဲတွင် မဲမသမာမှု ရှိသည်ဟုဆိုကာ စစ်အာဏာသိမ်းခဲ့ပြီး လူထုခေါင်းဆောင် ဒေါ်အောင်ဆန်းစုကြည်နှင့် သမ္မ တ ဦးဝင်းမြင့်တို့ကို မတရားအကျဉ်းချထားခဲ့သည်။

ယင်းနောက် စစ်အာဏာသိမ်း​ပြီး ၅ နှစ်အကြာ အတုအယောင်ရွေးကောက်ပွဲ ကျင်းပ၍ အတုအယောင် လွှတ်တော်က​ ရွေးကောက် တင်မြှောက်သော အကြမ်းဖက် သမ္မတအဖြစ် ရာထူးရယူထားသည်။

ဓာတ်ပုံ- အီးပီအေ။ (ပုံအဟောင်းကို အသုံးပြုထားပါသည်။)

The post မြန်မာ့နိုင်ငံရေးအကျပ်အတည်းပြေလည်ရန် ဒေါ်အောင်ဆန်းစုကြည်နှင့် တွေ့ဆုံဆွေးနွေးမှုမပါဘဲ လမ်းစမရနိုင်ဟု NLD ပါတီ ထုတ်ပြန် appeared first on Khit Thit Media.

🔗 ဖတ်ရန်: https://yktnews.com/2026/04/246910/
📌 Khit Thit Media

📰 ကော့ကရိတ်တွင် စစ်တပ်က လက်နက်ကြီး၊ ဒရုန်းများဖြင့် ကျေးရွာများကို နေ့စဉ် တိုက်ခိုက်မှု နေအိမ်များပျက်စီး၊ ပေါက်တွင်လည်း စစ်တပ်က ကျေးရွာများကို ဒရုန်းဖြင့် ဗုံးကျဲ တိုက်ခိုက်မှု ပြည်သူ ၅ ဦး ထိခိုက်ဒဏ်ရာရ

📅 April 5, 2026 at 01:45 PM

ရန်ကုန်၊ ဧပြီ ၅

ကရင်ပြည်နယ်၊ ကော့ကရိတ်မြို့နယ်ရှိ အကြမ်းဖက် စစ်တပ်က လက်နက်ကြီး၊ ဒရုန်းများဖြင့် ကျေးရွာများကို နေ့စဉ် တိုက်ခိုက်ခြင်းကြောင့် နေအိမ်များပျက်စီးမှုရှိကြောင်း ဒေသပြည်သူများက ရန်ကုန်ခေတ်သစ် သတင်းဌာနထံသို့ ပြောဆိုသည်။

ယနေ့ ဧပြီလ ၅ ရက်နေ့ နံနက်ပိုင်းမှ စတင်ပြီး မွန်းလွဲပိုင်းထိ အကြမ်းဖက် စစ်တပ်က ကော့ကရိတ်မြို့နယ်၊ နောင်ကိုင်းရွာဘက်ကို လက်နက်ကြီး၊ ဒရုန်းများဖြင့် ဆက်တိုက် ဗုံးကျဲ ပစ်ခတ် တိုက်ခိုက်ခဲ့ကြောင်း၊ ထိုတိုက်ခိုက်မှုအတွင်း ပြည်သူများ ထိခိုက်မှုမရှိသော်လည်း နေအိမ်များ ပျက်စီးမှုရှိကြောင်း သိရသည်။

ထို့ပြင် မတ်လ ၃၀ ရက်နေ့ နံနက်ပိုင်းကလည်း အကြမ်းဖက် စစ်တပ်က တိုက်ပွဲဖြစ်ပွားခြင်းမရှိဘဲ ကော့ကရိတ်မြို့နယ်၊ သာယာကုန်းရွာကို ဒရုန်းဗုံးများ ကျဲချ တိုက်ခိုက်ခဲ့သောကြောင့် နေအိမ်များ ပျက်စီးခဲ့ကြောင်း သိရှိရသည်။

စစ်ခွေးတွေက ဒရုန်း၊ လက်နက်ကြီးတွေနဲ့ ကော့ကရိတ်မြို့နယ်ထဲမှာ တိုက်ခိုက်နေတာကတော့ နေ့တိုင်းနီးပါးပဲ ပြည်သူတွေတော့ ထိခိုက်တာမရှိပါဘူး။ နေအိမ်တွေ ပျက်စီးတာပဲရှိတယ်။ တိုက်ပွဲဖြစ်တာတော့မရှိပါဘူး ဟု ဒေသပြည်သူတစ်ဦးက ပြောဆိုသည်။

အလားတူ မကွေးတိုင်း၊ ပေါက်မြို့နယ်တွင်လည်း ပျူစောထီးကျေးရွာများကို ရိက္ခာပို့ပြီး ပေါက်မြို့ပေါ်သို့ ပြန်လာသော အကြမ်းဖက် စစ်တပ် စစ်ကြောင်းသည် ၎င်းတို့ဖြတ်သန်းသွားရာ လမ်းပိုင်းရှိ ကျေးရွာများကို ဒရုန်းဖြင့် ဗုံးကျဲ တိုက်ခိုက်ခြင်းကြောင့် ပြည်သူ ၅ ဦး ထိခိုက်ဒဏ်ရာရရှိခဲ့ကြောင်း ဒေသပြည်သူများက ရန်ကုန်ခေတ်သစ် သတင်းဌာနထံသို့ ပြောဆိုသည်။

ဧပြီလ ၄ ရက်နေ့တွင် ပေါက်မြို့နယ် တောင်ပိုင်းရှိ ပျူစောထီး ကျေးရွာများကို ရိက္ခာပို့ပြီး ပြန်လာသော အကြမ်းဖက် စစ်တပ် စစ်ကြောင်းသည် ဇံရွေးခုံရွာနှင့် ကျားပစ်ကန်ရွာကို ဒရုန်းဖြင့် ဗုံးကျဲ တိုက်ခိုက်ခဲ့ကြောင်း၊ ထိုတိုက်ခိုက်မှုအတွင်း ကျေးရွာနေပြည်သူ ၅ ဦး ထိခိုက်ဒဏ်ရာရရှိခဲ့ကြောင်း သိရသည်။

အခု စစ်ခွေးစစ်ကြောင်းက ပျူစောထီးရွာတွေကို ရိက္ခာပို့ပြီးတော့ ပေါက်မြို့ပေါ်ကို ပြန်နေတာပေါ့။ သူတို့ ပြန်တဲ့ လမ်းကြောင်းမှာရှိတဲ့ ရွာတွေကို စစ်ခွေးတွေက ဒရုန်းတွေနဲ့ ဆက်တိုက်ကို ဗုံးကျဲနေတာ ပြည်သူ ၅ ဦး ထိခိုက်တယ်လို့တော့ သိရတယ်။ သေဆုံးတာတော့ မရှိပါဘူး ဟု ဒေသပြည်သူတစ်ဦးက ပြောဆိုသည်။

The post ကော့ကရိတ်တွင် စစ်တပ်က လက်နက်ကြီး၊ ဒရုန်းများဖြင့် ကျေးရွာများကို နေ့စဉ် တိုက်ခိုက်မှု နေအိမ်များပျက်စီး၊ ပေါက်တွင်လည်း စစ်တပ်က ကျေးရွာများကို ဒရုန်းဖြင့် ဗုံးကျဲ တိုက်ခိုက်မှု ပြည်သူ ၅ ဦး ထိခိုက်ဒဏ်ရာရ appeared first on Khit Thit Media.

🔗 ဖတ်ရန်: https://yktnews.com/2026/04/246916/
📌 Khit Thit Media

📰 တောင်သာမြို့နယ်တွင် စစ်ကြောင်းထိုးနေသည့် စစ်တပ်က ကျေးရွာများကို ဒရုန်းဖြင့် တိုက်ခိုက်မှု ပြည်သူ ၂ ဦးသေဆုံးပြီး စက်တပ်လေထီးများကလည်း ၂ ရက်ဆက် ဗုံးကျဲနေ

📅 April 5, 2026 at 01:34 PM

ရန်ကုန်၊ ဧပြီ ၅

မန္တလေးတိုင်း၊ တောင်သာမြို့နယ်တွင် စစ်ကြောင်းထိုးနေသည့် အကြမ်းဖက် စစ်တပ်က ကျေးရွာများကို ဒရုန်းဖြင့် တိုက်ခိုက်ခြင်းကြောင့် ပြည်သူ ၂ ဦးသေဆုံးပြီး စက်တပ်လေထီးများကလည်း ၂ ရက်ဆက် ဗုံးကျဲနေကြောင်း ဒေသပြည်သူများက ရန်ကုန်ခေတ်သစ် သတင်းဌာနထံသို့ ပြောဆိုသည်။

ယနေ့ ဧပြီလ ၅ ရက်နေ့ နံနက်ပိုင်းတွင် အောင်သာရွာကျေးရွာအတွင်း တပ်စွဲထားသော အကြမ်းဖက် စစ်တပ် စစ်ကြောင်းသည် ရွှေ‌စမ်းချောင်းရွာပေါ်ကို ဒရုန်းဖြင့် ဗုံးကျဲချ တိုက်ခိုက်ခဲ့သောကြောင့် ကျေးရွာနေပြည်သူ အသက် ၆၁ နှစ်အရွယ် အမျိုးသမီး ၁ ဦးနှင့် အသက် ၅၈ နှစ် အရွယ် အမျိုးသမီး ၁ ဦးသေဆုံးခဲ့ပြီး ၁ ဦး ထိခိုက် ဒဏ်ရာရရှိကာ နွား ၂ ကောင်လည်း သေဆုံးခဲ့ကြောင်း သိရသည်။

ထို့ပြင် ယနေ့ မွန်းလွဲ ၂ နာရီ ၅၀ မိနစ်ခန့်တွင်လည်း အကြမ်းဖက် စစ်တပ်က စက်တပ်လေထီးများဖြင့် ပန်းပေါင်းရွာပေါ်ကို ဗုံးကျဲ တိုက်ခိုက်ခဲ့သောကြောင့် ပြည်သူပိုင် နေအိမ် ၄ လုံးပျက်စီးခဲ့ကြောင်း၊ အလားတူ ယမန်နေ့ ဧပြီလ ၄ ရက်နေ့ ညနေ ၅ နာရီကျော်ခန့်ကလည်း မိတ္ထီလာလေတပ်မှ တက်လာသော စက်တပ်လေထီး ၂ စီးက တောင်သာမြို့နယ် အရှေ့တောင်ခြမ်းရှိ ကျေးရွာများကိုလည်း လေကြောင်း တိုက်ခိုက်မှု ပြုလုပ်သွားကြောင်း သိရှိရသည်။

လက်ရှိချိန်တွင် တောင်သာမြို့နယ်အတွင်း အကြမ်းဖက် စစ်တပ်က မြေပြင်မှလည်း စစ်ကြောင်းထိုးနေပြီး လေကြောင်းဖြင့်လည်း ဆက်တိုက် ဗုံးကျဲ တိုက်ခိုက်နေခြင်းကြောင့် ထောင်နှင့်ချီသော ပြည်သူများသည် ဘေးလွတ်ရာ တိမ်းရှောင်နေရကြောင်း သိရသည်။

စစ်ခွေးတွေ ဗုံးကျဲတာက ၂ ရက်ဆက်ကို ဗုံးကျဲ တိုက်ခိုက်သွားတာ စက်တပ်လေထီးနဲ့ ဗုံးကျဲတာတော့ကတော့ ထိခိုက်မှုမရှိဘူး။ နေအိမ်တွေ ပျက်စီးတာပဲရှိတယ်။ ဒရုန်းနဲ့ ဗုံးကျဲ တိုက်ခိုက်သွားတာကတော့ ပြည်သူ ၂ ဦး သေဆုံးတယ်။ ၁ ဦး ထိခိုက်ဒဏ်ရာရတယ်။ အခုက မြေပြင် စစ်ကြောင်းကော လေကြောင်းနဲ့ပါ ဆက်တိုက်ကို တိုက်ခိုက်နေလို့ ပြည်သူတွေလည်း ဘေးလွတ်ရာ တိမ်းရှောင်နေရတယ် ဟု ဒေသပြည်သူတစ်ဦးက ပြောဆိုသည်။

အဆိုပါ အကြမ်းဖက် စစ်တပ် စစ်ကြောင်းသည် လက်ရှိချိန်တွင် တောင်သာ-ရုံးစည်ကြီး လမ်းပိုင်းတလျှောင်၌ ကင်းပုန်းဝပ်နေပြီး အောင်သာ ရွှေမန်း ပန်းပေါင်း လမ်းပိုင်းဂိတ်ကို ခြေကုပ်ယူထားကြောင်း၊ ယင်းစစ်ကြောင်းတွင် အင်အား ၈၀ ခန့်ပါဝင်ကြောင်း သိရသည်။

ဓာတ်ပုံ စစ်ကိုင်းတိုင်း အတွင်းရှိကျေးရွာတစ်ရွာကို စစ်တပ်က မီးရှို့ဖျက်ဆီးခြင်းကြောင့် နေအိမ်များ မီးလောင်နေစဉ် (ပုံအဟောင်းဖြစ်သည်)

The post တောင်သာမြို့နယ်တွင် စစ်ကြောင်းထိုးနေသည့် စစ်တပ်က ကျေးရွာများကို ဒရုန်းဖြင့် တိုက်ခိုက်မှု ပြည်သူ ၂ ဦးသေဆုံးပြီး စက်တပ်လေထီးများကလည်း ၂ ရက်ဆက် ဗုံးကျဲနေ appeared first on Khit Thit Media.

🔗 ဖတ်ရန်: https://yktnews.com/2026/04/246913/
📌 Khit Thit Media

📰 မြန်မာနိုင်ငံတစ်ဝန်း စစ်ကောင်စီတပ်ဖွဲ့ဝင် ၁၆ ဦးသေဆုံး

📅 April 5, 2026 at 03:08 PM

ရန်ကုန်၊ ဧပြီ ၅

မြန်မာနိုင်ငံတစ်ဝန်း ဧပြီလ ၅ ရက်နေ့ ရရှိထားသော အချက်အလက်များအရ စစ်ကောင်စီ တပ်ဖွဲ့ဝင် ၁၆ ဦး သေဆုံးကြောင်း ပြည်သူ့ကာကွယ်ရေးတပ်ဖွဲ့များ၏ ထုတ်ပြန်ချက်နှင့်ပြောဆို ချက်များအရ သိရှိရသည်။

ရန်ကုန်ခေတ်သစ်အနေဖြင့် နေ့စဉ် စစ်သား သေဆုံးမှု စာရင်းများကို ထုတ်ပြန် ရာတွင် ဒေသကာ ကွယ်ရေးတပ်ဖွဲ့များ၏ ထုတ်ပြန်ချက်များနှင့် ပြောဆိုချက် များကို စုစည်းဖော် ပြရခြင်းဖြစ်ပြီး မြေပြင် အခြေအနေတွင် အမှန်တကယ် စစ်သားများ သေဆုံးမှု ရှိ၊ မရှိ ကွင်းဆင်း အတည်ပြုနိုင်ခြင်း မရှိသည်ကို သိစေအပ်ပါသည်။

The post မြန်မာနိုင်ငံတစ်ဝန်း စစ်ကောင်စီတပ်ဖွဲ့ဝင် ၁၆ ဦးသေဆုံး appeared first on Khit Thit Media.

🔗 ဖတ်ရန်: https://yktnews.com/2026/04/246924/
📌 Khit Thit Media

📰 ငဖဲမြို့ပေါ်ထိ CDF – Asho မှ ရဲဘော်များ ဝင်ရောက်ခဲ့ပြီး မြို့လုံခြုံရေးနှင့် စစ်ဆေးရေးများ လုပ်ဆောင်

📅 April 5, 2026 at 02:06 PM

ရန်ကုန်၊ ဧပြီ ၅

မကွေးတိုင်း၊ ငဖဲမြို့ပေါ်ထိ CDF Asho မှ ရဲဘော်များ ဝင်ရောက်ခဲ့ပြီး မြို့လုံခြုံရေးနှင့် စစ်ဆေးရေးများ လုပ်ဆောင်ခဲ့ကြောင်း CDF Asho မှ ပြောရေးဆိုခွင့်ရှိသူ ဆလိုင်းရိုးချင်းက ရန်ကုန်ခေတ်သစ် သတင်းဌာနထံသို့ ပြောဆိုသည်။

ယနေ့ ဧပြီလ ၅ ရက်နေ့ နံနက်အစောပိုင်းတွင် ငဖဲမြို့အတွင်းရှိ မြို့နယ်ပညာရေးမှူးရုံးနှင် ကြံ့ဖွတ်ပါတီ ရုံးများကို CDF Asho မှ စစ်ကြောင်းမှူး မြွေပွေးဦးဆောင်ပြီး မြို့လုံခြုံရေးနှင့် စစ်ဆေးရေးများ ဝင်ရောက် လုပ်ဆောင်ခဲ့ခြင်းဖြစ်ကြောင်း သိရသည်။

ထိုသို့ CDF Asho မှ ရဲဘော်များ မြို့ပေါ် ဝင်ရောက်လာချိန်တွင် အကြမ်းဖက် စစ်သားများ မရှိသောကြောင့် တိုက်ပွဲဖြစ်ပွားခဲ့ခြင်းမရှိကြောင်း၊ အကြမ်းဖက် စစ်တပ်သည် ငဖဲမြို့ တောင်ဘက်ပိုင်း နေရာယူထားခြင်းဖြစ်ပြီး CDF Asho မှ ရဲဘော်များက မြို့မြောက်ဘက်မှ ဝင်ရောက်ခဲ့ခြင်းဖြစ်ကြောင်း သိရှိရသည်။

တိုက်ပွဲတော့ မဖြစ်ပါဘူး။ ကျနော်တို့ မြို့ပေါ်ကို တက်ပြီး အင်အားပြတဲ့ သဘောမျိုးပါပဲ။ စစ်ခွေးက မြို့ရဲ့ တောင်ဘက်ပိုင်းမှာ နေရာယူထားတာဆိုတော့ ကျနော်တို့က မြောက်ဘက်ကနေ မြို့ထဲကို ဝင်ရောက်ခဲ့တာပေါ့။ အဓိက ကျနော်တို့ အနေနဲ့ မြို့ပေါ်ထိ ဝင်ပြီး အင်အားပြရတဲ့ ရည်ရွယ်ချက်က ပြည်သူတွေအနေနဲ့ အကြမ်းဖက် သမ္မတသစ်ရဲ့ ဟန်ဆောင်ပြီး ညင်သာပြတဲ့ အုပ်ချုပ်မှုတွေကို မယိမ်းယိုင်သွားဖို့ စစ်ကော်မရှင်အနေနဲ့ အခုထိလည်း ရက်စက်ကြမ်းကြုပ်စွာ ပြည်သူအပေါ် ပြုမူနေတာကို မေ့မသွားကြဖို့ စစ်အစိုးရစနစ်ကို တော်လှန်နေရမယ်ဆိုတာကို ပြောချင်ပါတယ် ဟု CDF Asho မှ ပြောရေးဆိုခွင့်ရှိသူ ဆလိုင်းရိုးချင်းက ပြောဆိုသည်။

အကြမ်းဖက် သမ္မတသစ် မင်းအောင်လှိုင်ကို ပုန်ကန်ကြရန်နှင့် အကြမ်းဖက် မြန်မာ့တပ်မတော်၏ ကာကွယ်ရေးဦးစီချုပ်အသစ်လက်ထက်တွင် ထပ်မံ၍ ကျူးလွန်နေသော စစ်ရာဇဝတ်မှုများကို ပြည်သူများမှ မေ့လျှော့ မသွားကြရန် ချင်းကာကွယ်ရေးတပ်-အရှို (CDF_Asho) က ပြောဆိုထားသည်။

The post ငဖဲမြို့ပေါ်ထိ CDF Asho မှ ရဲဘော်များ ဝင်ရောက်ခဲ့ပြီး မြို့လုံခြုံရေးနှင့် စစ်ဆေးရေးများ လုပ်ဆောင် appeared first on Khit Thit Media.

🔗 ဖတ်ရန်: https://yktnews.com/2026/04/246919/
📌 Khit Thit Media