Advertising on the Telegram channel «Qaroo Post»

Phaaphaasiin Roomaa ariitiin Gaazaa daawwachuu qabu- Maadoonaa ‎ ‎Weellistuun beekamtuu Ameerikaa Maadoonaan Phaaphaasiin amantaa Kaatoolikii Roomaa Lii'oo 14ffaa dhimma beela hamaa Gaazaa keessa jiruuf atattamaan fala barbaaduuf Gaazaa daawwachuu qabu jechuun waamicha isaaniif dhiyeessiteetti. ‎ ‎Akkuma Dhimma UK, Gamtaa Awuroopaa, Kaanaadaa fi Awustraaliyaa gidduu seenan dhimmi Gaazaas isaan dhiphisuu qaba jechuun ergaa dabarsite. ‎ ‎Gaazaa dhaquudhaan miidhamni daa'immanii irra gahaa jiru akka sirraa'uuf yaadi abbummaa keessanii murteessaadha, jechuun akka haadhaatti miidiyaa hawaasummaan phaaphaasicha gaafatteetti. ‎ ‎Weellistuun kun hawaasni idil-addunyaa miidhama namoota irra gahaa jiruuf xiyyeeffannoo kennee haala Gaazaa keessatti deemaa jiru akka dhaabsisu ergaa dabarsiteetti. ‎ ‎Maadoonaan wallee isheetiin Rakkoo Gaazaa keessa jiru tuttuqxeetti. ‎ ‎ Jaalalli akka jiraatuufi biyyoota giddu gala bahaa keessatti nagaan akka bu'u Maadoonaan cimsitee gaafatteetti. ‎ ‎Madda: BBC ‎@QarooPost

Artist Yosan Getahun lammiilee keenya sababa lolaa rooba ulfaataatiin qe’ee fi qabeenya isaaniirraa buqqa’aniif deggersa midhaan nyaata taasise. Haasaa taasiseenis “isin warra gootaraa dilbiiti. Warra kuma horee of irra darbee warra magaalaa jiraachisaa turedha. Rakkoon isin mudate rakkoo uumamaa waan ta'eef nutis isin waliin jirraa qomoon keessan bal'aanis isiniif birmataa jabaadhaa” jechuun hawaasichatti hamilee horeera. Itti dabaluudhanis Deeggarsa taasifame keessaa Abbaan qabeenyaa Yaadataa Junaddiin gahee guddaa akka qabanii fi uummatichaan jajjabaadha isin waliin jirra akka jedhan Artiisti Yoosan Geetahun hawaasichatti himee jira. Hiriyoottan isaa naannawaa Sabbataa, Furii fi Jamoo deeggarsicha irratti hirmaatanis galateeffatee jira. @QarooPost

Maamiltoonni haaraan kuma 501 ol fayyadamoo tajaajila elektirikii ta’an Bara bajataa 2017tti maamiltoonni haaraan kuma 501 ol fayyadamoo tajaajila elektirikii taasiseera jechuun Tajaajilli Elektirikii Itoophiyaa beeksise. Tajaajilichi raawwii hojii karoora bara bajataa 2017fi karoorawwan ijoo bara bajataa 2018 irratti miidiyaaleef ibsa kenneera. Raawwachiisaa Hojii Olaanaan tajaajilichaa Injiinar Geetuu Garramawu akka ibsanitti, bara bajataa xumurametti maamiltoonni haaraan lakkoofsaan hedduu seenaa keessatti galmaa’ee hinbeekne qaban fayyadamoo tajaajila elektirikii ta’aniiru. Maamiltoonni galmaa’anii waggootaaf eegaa turan kuma 501fi 588 tajaajila ibsaarraa fayyadamoo ta’aniiru. 148 giriidiirraa; torba oofgiriidiirraa, walumaagalatti gandoonni baadiyyaa 155 fayyadamtoo humna ibsaa ta’aniiru. Maamiltoota bara bajataa darbee dabalatee lakkoofsi maamiltoota dhaabbatichaa waliigalaa miliyoona 5.21 caaluu dubbataniiru. @QarooPost

“Furmaanni dhibdeewwan siyaasa Itoophiyaa aadaa siyaasaa ilaaf ilaamee dagaagsuufi waaressuudha” obbo Hayiluu Addunyaa Gumiin Balal marsaa 44ffaan mata duree "Dhibdeewwan Siyaasa Itoophiyaa kaleessaa hanga har’aatti" jedhuun qophaa’e haayyoota Yuunivarsiitiifi Dhaabbilee garaa garaa hirmaachisuun geggeeffamaa jira. Gumicharratti argamuun haasawaa kan taasisan hoogganaan Biiroo Kominikeeshinii Oromiyaa obbo Hayiluu Addunyaa Itoophiyaan biyya sirna Mootummaa garaagaraa keessummeessaafi dhawataan ijaaramaa dhufte ta'uu kaasuun, biyya birmadummaan ishee wareegama qaalii ilmaan ishee kaffalaniin kabajame, biyya sabdaneettii, uummata walooma beekuufi kabaju, waloonis biyya ijaaru, duudhaa gabbataa horata nagaa waaressuuf tolu qabdu ta’uu ibsaniiru. Haa ta’u malee, imala ijaarsa sirnaa keessatti duudhaa mandhalee kana sirneessuu dhabuu irraa kan ka’e dhibdeewwan siyaasaa akka dhalatuufi babal’atu taasisuu himuun, madaalli eenyummaa sabummaafi tokkummaa biyyaalessaa karaa walfaallessuun hojiirra oolaa dhufuu isaatiin seeneffamoonni qeenxee dhugaa sabootaafi biyyaa moggeessan olaantummaa argachaa, dhibdeen garaagarummaa ilaalcha siyaasaa fayyaalessummaa hin qabnes bu’uura qabachaa dhufuun biyya gaaga’ama hin malleef kan saaxile ta’uu dubbataniiru. Aadaan siyaasaa Itoophiyaa maraammartoo keessa seene kunis mariyachuurra atakaaroo, ijaarsaarra diigumsa, waloomarra qeenxummaa olaantummaa gonfachiisuun nagaafi tasgabbiin ijibbaatamuu himuun, Biyya irraafi jalli ishee hundaan badhaate bakka ga’uu qabdurraa hankaaksuun sarara hiyyummaa gad akka jiraattuufis dirqamsiisuu obbo Hayiluun kaasaniiru. Miidiyaan dijiitaalaa babal’achuufi dhiibbaan gama sirna giloobaalaayizeeshiniin lafa qabachaa dhufes qormaatawwan dhibdee siyaasaa babal’isaa jiran ta’uu kan eeran obbo Hayiluun hayyootni ilaafi ilaameen biyya yoo hin utubne, jaalalli biyyaa yoo hin dagaagne, lammileen sirnaafi biyya isaaniif dursa yoo hin laanne waliigalteefi araara biyyaalessaa eegalamerratti dhiibbaa kan qabu ta’uus himaniiru. Kanaafis furmaanni bu’uuraa dhibdeewwan siyaasa Itoophiyaa aadaa siyaasaa ilaaf ilaamee dagaagsuufi waaressuun seenessa waloo ijaaruu irraa kan maddu ta’uu hubachiisuun lammileen dhimmoota walooma gabbisan olkaasuu irratti xiyyeeffachuu qabus jedhaniiru. Imala kanaan seenaafi seenessa qeenxee maksuun biyya hundaaf taatu, hunda fakkaattuufi hunda tajaajiltu madaala eenyummaa sabummaafi tokkummaa biyyaalessummaa karaa eegeen sirna cimaarratti ijaaruuf xiyyeeffannoon kennamee hojjetamaa jiraachuus obbo Hayiluun hubachiisaniiru. Sagantaa kana irratti waraqaan ka'umsa marii mata duree "Dhibdeewwan Siyaasa Itoophiyaa kaleessaa hanga har’aatti" jedhuun Dr. Biraanuu Leenjisoon dhiyaachaa jira. Maddi: BKO @Qaroopost

#Ameerikaa #Raashiyaa Pireezidaantiin Ameerikaa Doonald Tiraampii fi Pireezidaantiin Raashiyaa Vilaadmiir Puutin guyyaa har'aa wal arguuf jiru. Walgahiin pireezdaantota lamaanii yuunayitid Isteet Alaaskaa Ankooreej keessatti akka ta'ee fi kaayyoon isaa waraana Yukreen keessa jiru dhaabuuf akka ta'e ibsameera. Haa ta'u malee waliigalteen waraana dhaabuu ni mallatteeffama kan jedhu addaan hi baane. Sodaa nageenyaa fi dhiphinna yeroo irraa kan ka'e wal gahiin Doonald Tiraampii fi Vilaadmiir Puutin Kaampii waraana Ameerikaa keessatti adeemsifama. Mariin kunis, Tiraamp Raashiyaadhaaf yeroo dhumaaf gaafii walii galtee dhukaasa dhaabuu erga dabarsanii torbee tokko booda kan dhufeedha. Tiraamp mariin kun bifa gaariin kan adeemu yoo ta'e, osoo hin turin Pireezidaantii Yukreen Zaalaniskii waliin wal gahii mootummoota sadeeni taasisu akka danda'an eeraniiru. Haa ta'u malee, Yuukreen marii kanatti afeeramuu dhabuu isheetiin aariidhaan deebii kennitee jirti. Akka ibsa isheetti ''Waliigalteen nagaa nuun ala taasifamu kamiiyyuu, Putiniif moo'uu dha" jedhaniiru. Walumaagalatti, Walgahiin Alaaskaa marii nagaatiif carraa banuu danda'us, walgahichi fuulduree waraana Yukreenii fi Madaalli humna Addunyaa irratti dhiibbaa akka godhu himameera. @Qaroopost

Albamni Leencoo Guddinaa Haaraan ''Hibboo?'' jedhu Eebbifamuufi. Albamni haaraa weellisaa Leencoo Guddinaa "Hibboo?" Jedhu Eebbifamuuf ta'u Koreen Eebbaa ibseera. Albamni kun Hagayya 25 bara 2017 akka Eebbifamuus ibsame. Artist Leencoo Guddinaa kana dura walleewwan Afaan Oromoo qeenxee sadii jaallattoota isaa biraan gaheera . Albamni kun walleewwan 14 kan qabate yoo ta'u walaloofi yeedaloon artiistoonni Oromoo hedduu irratti hirmaataniiru . Albama kana hojjatee xumuruuf Waggaa lamaa ol kan fixe yoo ta'u birrin miil. 6 baasii ta'uu himame. Albamni kun Magaalaa Finfinnee Hoteela 'Skylight'tti Hagayya 25 sa'aatii 8:00 irraa eegale ni eebbifama . Jaallattonni Artii Oromoo sagantaa kana irratti akka hirmaatan koreen Eebba Albama kanaa dhaameera. Iyerusaaleem Shimallis @QarooPost

US namoota wal'aansaaf Gaazaarraa imalaniif viizaa kennuu dhaabde. Ameerikaan viizaa namoota Gaazaa irraa garas imalaniif kennaa turte kennuu dhaabuu ibsite. Jaarmiyaan dhimmi kun ilaallatu viizaa kennuun yeroof kan dhaabateef ''adeemsa jiru sirriitti qorachuuf akka ta'ee fi qajeeltoo yeroo ammaa tajaajila fayyaa xixiqqoo kennuuf jecha viizaan kennamu hubachuuf akka ta'e,'' X irratti ibse. Murtee Ameerikaa kana gareen mirga namoomaa Filisxeemiif falman balaaleffataniiru. Jaarmiyaan qarqaarsa daa'immanii Filisxeem- Palestine Children's Relief Fund jedhamu tarkaanfiin kun ''daa'imman Gaazaatti miidhaman gara US geessuun tajaajila fayyaa argatanii lubbuunsaanii akka baraaramu gochuu irratti miidhaa guddaa qaba,'' jedhe. Ameerikaan dhimma viizaa jiraattota Gaazaa irratti jijjiirama imaammataa kan ibsite erga rogeettiin warra sirna duriitti cichanii (far right) dhimma viizaa kana irratti qeeqa jajjabaa irra deddeebiin X irratti barreessiteeti. Viizaa namoota Gaazaa irraa imalaniif kennamu yeroof dhaabuutti Ministira Dhimma Alaa US Maarkoo Ruubiyoo galateeffatte. Jaarmiyaan qarqaarsa daa'immanii -Palestinian Children's Relief Fund sagantaa tajaajila fayyaa biyya alaan bara 2024 keessa daa'imman 169 Gaazaa keessaa baasuu ibse. Daa'immaan tajaajila fayyaa barbaadan kunneen gara Baha Jiddugaleessaa, Awurooppaa, Afrikaa Kibbaa fi Ameerikaatti geessuu ibse jaarmiyaan kun. Jaarmiyaaleen gargaarsa namoomaa dhiheessan erga Israa'el ji'a Bitootessaa keessa gargaarsa gara Gaazaa seenutti daandii cuftee nyaata ga'aa jiraattotaaf dhiheessuun hin danda'amne jedhu. Tarkaanfiin Israa'el kun jaarmiyaaleen miti-mootummaa jiraattota Gaazaa beelaan dhumaa jiraniif dhaqqabuun akka hin baraarre taasise jedhan. Mootummaan Israa'el ammoo gargaarsa namoomaatti karaa kan cufeef akka Hamaas nyaata hin fudhanneef jedhe. Garuu nyaata dhabuun du'aa kan jiran daa'imman Gaazaati. Jaarmiyaaleen gargaarsaa deeggarsa UN qaban hedduun, gareen mirga dhala namaaf falman fi gaazexeessitoonni Gaazaa keessatti beelaan uummanni dhumaa jira jechuun yaaddoo qaban ibsaa jiru. Xummura Adoolessa darbee kanatti miidiyaaleen idiladdunyaa kanneen akka AFP, AP fi Rooyitars Gaazaa keessatti gaazexeessitoonni beelaan dhumaa jiraachuu ilaachisuun wayita ibsan BBCn itti dabalamee ture. ''Ji'oota hedduuf gaazexeessitoonni waa hundarraa bilisa ta'an kunneen waan qabatamaan Gaazaa keessa jiru ijaa fi gurra addunyaan ga'aa turan. Amma isaanis akkuma namoota waa'eesaanii gabaasaa turaniitti dararaa argaa jiru,'' jedhan miidiyaaleen kunneen. Adoolessa darbe keessa Pireezidantiin US Doonaald Tiraamp ''beelli inni sirriin Gaazaa keessa jira,'' jedhanii turan. Haata'u malee ammas qondaala ijoollee Gaazaa beelessuun himataman Beenjaamiin Neetaaniyaahuu faana hiriiranii jiru. @QarooPost

Mootummaan baatii Fulbaanaarraa eegalee hojjettootaaf fooyya’iinsa daballii miindaa taasisuuf murteesse Mootummaan Fulbaana 2018 irraa eegalee hojjettoota mootummaaf fooyya’iinsa daballii miindaa taasisuuf murteesseera. Koomishiniin Siiviil Sarvisii Federaalaa ibsa baaseen, mootummaan haala jiruufi jireenyaa lammiilee fooyyessuuf tarkaanfii dandeettiin biyyaa eeyyamu fudhachaa jiraachuu ibseera. Haaluma Kanaan mootummaan hojjettoota mootummaaf fooyya’iinsa daballii miindaa taasisuuf murteessuu beeksiseera. Fooyya’iinsa Kanaan miindaan hojjetoota mootummaa inni gadi aanaan Birrii kuma 4 fi 760 irraa gara Birrii kuma 6’tti akka guddatu ibsameera. Miindaan hojjettoota mootummaa inni olaanaan ammoo Birrii kuma 21 fi 492 irraa gara Birrii kuma 39’tti kan guddatu ta’uun eerameera. Miindaan ka’umsa eebbifamtoota digirii jalqabaa Birrii kuma 6 fi 940 irraa gara Birrii kuma 11 fi 500’tti fooyya’a jedhameera. Miindaan hojjettoota mootummaa siiviil sarvisiin ala dameewwan garaagaraa keessatti bobba’anis kan fooyya’u ta’uu komishinichi beeksiseera. Fooyya’iinsi daballii miindaa kun baajata dabalataa Birrii biiliyoona 100 fi biiliyoona 60 ol gaafachuu kan ibse komishinichi, baasii mootummaa waliigala waggaatti miindaaf bahu Birrii biiliyoona 500 fi biiliyoona 60’n gahuu hubachiiseera. @QarooPost