Medicine student

هل يحتاج الطفل "ماء مخصص للأطفال"؟ 🤔
كثير من الأهل يشترون قناني مكتوب عليها "ماء للرضع" ويعتقدون أنها ضرورية أو أكثر أمانًا…
لكن الحقيقة:
❌ الطفل ما يحتاج ماء خاص أو مخصص للحليب
✅ أي ماء نظيف وآمن للشرب يكفي تمامًا.
إذا كان ماء البيت نظيف وصالح للشرب فهو مناسب لتحضير الحليب أو للشرب بدون أي مشكلة.
🔹 وإذا عندك شك بنظافة الماء:
الحل بسيط جدًا ⬅️⬅️⬅️اغلي الماء وخليه يبرد وبعدين استخدمه.
الغليان يقتل الجراثيم ويجعل الماء آمن للطفل 👍
طيب شنو قصة الفلور؟ 🦷
الدراسات تكول انه الفلور الموجود بالماء يؤثر على صحه الأسنان من يزيد عن حده بس المعلومه تكول:
✔️ كمية الفلور الموجودة عادة بالماء العراقي قليلة جدًا وآمنة
المي سواء مي حنفيه أو مي معلب أو مي اطفال
✔️ وما تحتاج تدور على ماء "خالٍ من الفلور"
بالعكس، الكميات الطبيعية من الفلور تفيد الأسنان لاحقًا.
الخلاصة 👇
👶 ماكو شي اسمه ماء ضروري للرضع
💧 أي ماء نظيف وآمن يكفي
🔥 إذا شكيت بالنظافة ⬅️ اغليه
🦷 الفلور مو مشكلة وما يحتاج تخاف منه
لا تدفع فلوس زيادة على شي الطفل ما يحتاجه 👍
د. سيف سمير البياتي أخصائي طب الأطفال

صيام المرضع في رمضان 🤱🌙
☺ السلام عليكم دكتور، هل صيامي في رمضان يؤثر على طفلي؟
في أغلب الحالات الصيام لا يؤثر مباشرة على الطفل.
الأمر يشبه حالة الأم التي ترضع وتكتشف أنها حامل — غالبًا الطفل يبقى بخير.
لكن الصيام ممكن يؤثر على صحة الأم أكثر من الطفل، لأنك تأكلين وتشربين أقل من الأيام الاعتيادية.
🙂 شنو الفرق بين المرضع وغيرها أثناء الصيام؟
تعرفين أن حوالي 88٪ من حليب الأم هو ماء 💧
وهذا يعني أنك تفقدين سوائل بشكل مستمر.
لذلك المرضع بالصيام ممكن تحس بـ:
عطش أكثر
تعب أسرع
دوار أو إرهاق أكثر من غير المرضع
😃 هل كل المرضعات نفس الشي؟
لا.
المرضع خلال أول 6 أشهر تتعب أكثر عادةً، لأن طفلها يعتمد بالكامل على الحليب.
أما بعد 6 أشهر:
الطفل يبدأ بالأكل
الاعتماد على الحليب يقل
الصيام يصير أسهل غالبًا
😐 إذا ناوية أصوم، شنو أسوي قبل رمضان؟
رتبي شغل البيت والأعمال الكبيرة مسبقًا
خففي الجهد خلال رمضان
خلي تركيزك على الراحة والرضاعة
😐 شلون أحافظ على الحليب وأقلل العطش؟
✔ اشربي تقريبًا 12 كوب سوائل يوميًا بين الإفطار والسحور
✔ ماء + شوربات + حليب + عصائر (يفضل بدون سكر)
✔ قللي الملح لأنه يزيد العطش
☺ شلون أعرف أن طفلي بدأ يتأثر؟
راقبي العلامات التالية:
❗ قلة التبول
❗ نقص الوزن
❗ قلة عدد مرات الإخراج
❗ الطفل يصير غير مرتاح بعد الرضاعة
إذا ظهرت هذه العلامات ممكن يعني إنتاج الحليب بدأ يقل.
🙄 أكو طرق تساعد أكثر؟
✔ إذا عمر الطفل فوق 4–6 أشهر:
ممكن تزيدين الأكل تدريجيًا
مو معناها فطام مبكر،
لكن تقليل الاعتماد الكامل على الحليب يساعد.
✔ الراحة قدر الإمكان 😌
🤗 تنصحني أصوم لو أفطر؟
هذا أكثر سؤال نسأله كأطباء…
لكن القرار غالبًا ديني أكثر من كونه طبي فقط.
إذا خفتي على:
نفسك
أو طفلك
فمسموح الإفطار وتعويضه لاحقًا.
🌙 رمضان كريم
علينا وعليكم
د. سيف سمير البياتي
اختصاص طب الأطفال 👶
#رمضان_كريم

تعرفون هذا الطفل اللي تدفعون له قسط الروضة…
يروح أول يوم، وثاني يوم يرجع مريض؟ 😅
وهكذا كل شهر… بل كل أسبوع!
نشلة ورا نشلة 🤧
كحة مزمنة
أنف مسدود
غيابات متكررة من الروضة أو المدرسة
وتبدأ الحيرة:
هل مناعته ضعيفة؟
وتتعبون من تكرار المضادات الحيوية؟ 💊
البروبايوتك قد تكون المفتاح 🌱
خصوصًا البروبايوتك من فصيلة:
لاكتوباسلس
و بايفيدوبكتريم
هذه البكتيريا النافعة تلعب دورًا مهمًا في تنظيم جهاز المناعة،
خصوصًا عند الأطفال الذين يعانون من التهابات تنفسية متكررة، وخاصة أطفال الروضات.
ماذا تقول الدراسات؟ 📚
🔸 انخفاض واضح في نسبة الإصابات الفايروسية
🔸 تحسن مدة المرض وشدته
🔸 تقليل أيام الغياب من الروضة أو المدرسة
🔸 تقليل استخدام المضادات الحيوية
البروبايوتك ليست فقط للمغص أو الإمساك…
بل تعتبر وسيلة فعالة لدعم المناعة والوقاية، ومدعومة بأبحاث علمية ✔️
مصادر البروبايوتك 🥛
اللبن (الزبادي)
الكفير
المخللات
مكملات جاهزة على شكل:
قطرات
أكياس
جيلاتين
كبسولات
من يُمنع من استخدام البروبايوتك ⚠️
1️⃣ نقص المناعة
(مثل مرضى السرطان أو زراعة الأعضاء أو الإيدز)
2️⃣ بعد العمليات الجراحية الكبيرة
3️⃣ وجود قسطرة وريدية مركزية
4️⃣ التهاب بنكرياس حاد
د. سيف سمير البياتي
أخصائي طب الأطفال 👶🏻
📎 روابط الدراسات في التعليقات
و طرق استخدامها

شويه تعديل مسار
دا اشوف عوده للاخطاء القديمه
يمكن البوستات القديمه ناسيها رغم حرصي انه اعيدها كل فتره
تعالوا نشوف شنو الاخطاء اللي شفتها بآخر كم يوم
❤ المكياله مال حليب بيها نوعيتين
الكبيره مال سيميلاك هاي تكفي رقمين مو رقم واحد
و العاديه مال باقي انواع الحليب مثل نوفلاك و بريملاك و بيبلاك و ديالاك
❤ المميات اختاروا الزينه و النوعيه الاصليه
اي أغلى صح
بس حساب المميه صحيح
مو نوعيه مميات حسابها خطأ
❤ حبابات و حبوبات
المرهم الامين للحفاظ هو اللي بيه زنك
مو خلطات الصيدليات العلاجيه
و لا النستاكورت
لان الاستخدام المطول لهذه النوعيه من المراهم تؤدي الى هشاشه العظام و ضمور الغده الكظريه و حصى الكليه
❤ فيتامين دي مو تحسبيه على حسب كلام جارتك
و مو كلما نزيد فيتامين دي
الطفل يكوم يطير
كل نوعيه بيها حساب معين و طريقه معينه
❤ كوليف
القطره الصفره للمغص
ما تشتغل اذا تخليها مباشر بفم الطفل
كوليف تشتغل ويه الحليب
ما يصير شي اذا انطيتيها مباشر
بس ما تشتغل الا تخلط مع الحليب لمده نصف ساعه
❤ البروبايوتك مو كلشي يرهم على كلشي لان اسمه بروبايوتك
اكو بروبايوتك للمغص
اكو بروبايوتك للاسهال
اكو بروبايوتك للامساك
اكو بروبايوتك للاستخدام النسائي و الفطريات
و اكو بروبايوتك للاستخدام اليومي
و كل البروبايوتك تفيد للمناعه اي تقريبا صح
❤ مو تنسون الشتاء ماله علاقه بالختان
يبقى الختان الأفضل هو أول شهر من العمر
صيفا شتاءا ربيعا خريفا
د. سيف سمير البياتي اخصائي طب الاطفال
قومي يا بت اقريلك كم بوست قبل ما توكعين بمشكله ويه الطفل و النوب شيخلصك من عمتك

20 شغله راح تلاحظيها من ترضعين طبيعي!!
من تقررين ترضعين طبيعي راح تلاحظين بعض الأشياء الغريبه اللي ممكن تصير بالرضاعه الطبيعيه، تعالوا نكتشفها سويه:
1. بعض الألم و الحرقه البسيطه بأول ايام الرضاعه الطبيعيه
من المعروف ان الرضاعه الطبيعيه تجربه عاطفيه جميله، الا انها ممكن تكون مؤلمه بالبدايه.
بعض الألم طبيعي، لكن اذا صار الألم شديد لازم نراجع طريقه التقام الحلمه لأن غالبا المشكله تكون بوضعيه الالتقام...
2. طفلك سيرضع كثيرا بالبدايه
هنا بعض الأمهات تترك الرضاعه الطبيعيه لان تشك ان حليبها ما يكفي، لأن الطفل حرفيا يبقى لازك بالام ويرضع.
السبب ان معدل النمو عالي جدا بأول ٣ اشهر، بحيث يضاعف وزن الولاده تقريبا خلال ٤ اشهر.
3. الكثير من التقلصات الرحميه من ترضعين طبيعي
و هذا شي يساعد يرجع الرحم لحجمه الطبيعي بسبب هرمون الاوكسيتوسين
و الثدي و الرحم يشتغل عليهم هذا الهرمون ( الاوكسيتوسين )
4. بعض الحليب سيتسرب لوحده
ممكن ينزل الحليب من تسمعين طفلك يبجي او حتى من تفكرين بطفلك او انه جوعان
5. راح تضعفين و تفقدين وزن و انت ترضعين طبيعي
الرضاعه الطبيعيه تحرق تقريبا ٥٠٠ كالوري يوميا
يلا رضعي طبيعي
و نزلي وزن ببلاش
6. راح تفضلين بعض الاكلات المعينه
مثل الحمل، ممكن تشتهين أكلات معينه أثناء الرضاعه
7. عطش شديد أثناء الرضاعه
كثير من الأمهات يحسون بعطش قوي اول ما الطفل يبدأ يرضع و لهذا اشربي مي هوايه
8. بعض اللخبطه بالدوره الشهريه
غياب او عدم انتظام الدوره طبيعي، لكن لا تعتمدين عليه كمانع حمل.
9. الرضاعه الطبيعيه ممكن تسبب النعاس
بسبب هرمون البرولاكتين.
10. امتلاء الثدي بدون تفريغ يسبب ثقل
راح تحسين كأنما حجاره بالثدي، و ترتاحين لما الطفل يرضع.
11. مع الخبره راح تحسين بنزول الحليب
كثير من الأمهات يوصفن احساس نزول الحليب بوضوح بعد فتره.
12. ممكن ينزل الحليب من الثدي الثاني
و انت ترضعين من جهه.
13. بعض الانزعاج اول ما ينزل الحليب
احساس غريب او عدم راحه بسيطه بالبدايه.
14. ممكن تستمرين بالرضاعه بعد عمر السنتين
و هذا قرار يخصك دام نمو الطفل طبيعي.
15. الطفل ما يرضع فقط لأنه جوعان
هو يرضع حتى يشعر بالامان و الدفء.
16. كثير من الاطفال ينامون أثناء الرضاعه
و هذا شي طبيعي جدا.
17. حجم الثدي ممكن يتغير أثناء الرضاعه
ممكن يكبر او يمتلئ اكثر بسبب الحليب.
18. ممكن تحسين بوخز بسيط بالثدي
هذا غالبا يكون بسبب نزول الحليب او امتلاء القنوات.
19. مزاجك ممكن يتحسن أثناء الرضاعه
بسبب هرمونات السعاده مثل الاوكسيتوسين.
20. الرضاعه الطبيعيه تقوي رابطه الام بطفلها
و تعطي الطفل شعور قوي بالامان.
د. سيف سمير البياتي
اخصائي طب الاطفال

وبديت اجهز للطفل الرابع ❤️

من يصير اكثر من طفل، تزيد الخبره
ونترك اشياء
ونلتزم باشياء لخ
لان بحكم الخبره
نعرف شنو الي فعلا يفيد
والي مو مفيد
او الي فائدته وقتيه
وبين الي فائدته دائمة او ثابته

ومع الطفل الرابع
اكيد الاولية حتكون للرضاعة الطبيعية
و التطوير العقلي ومن اول ايام

لان شفت الفرق وشفت الاثر على 3 اطفال قبله
بالوقت الي هواي ناس تؤمن بالابحاث والتجربه العلمية، اكو ناس اخرى تحب تشوف بعينها ومثل مايكولون اسأل مجرب

الرضاعة الطبيعية ، مناعة وصحة وترابط عاطفي مايروح ويه الزمن
والتطوير العقلي ذكاء وقدرات عقلية تستمر طول العمر

اختاريت برامج جلين دومان لانها تغطي كل الجوانب الي تحتاج تطوير والاهم لاني ام لاكثر من طفل واعتبر ام مشغوله ، والبرنامج يحتاج وقت جدا قليل ومدمج ف هذا الشي يناسبني

شنو مدمج؟ يعني للطفل حديث الولادة ميحتاج اجواء هوايه ولا تحضيرات هواية
افضل وقت هو وقت تبديل الحفاظة ، ولان هالشغلة تكرر هواي مرات باليوم ف هذا الوقت حيكون ممتاز لتطبيق البرنامج

كم ثانية وتكرر على طول اليوم وهيج نبدي بالتطوير العقلي الي حيستمر 3 سنوات تقريبا على نظام الثواني بدون ما نستقطع وقت طويل من يومنا المزدحم

وهاي الثواني حتساعد على بناء دماغ ذكي ويتطور بسرعة ويكتسب مهارات بدون تاخير ،
يعني يحجي من وقت ويعرف يعبر عن نفسه ويكون عنده ذكاء لغوي ومعرفي ومنطقي

تجربتي ؟
والفضل لله والمنه
اطفالي تطورهم ممتاز واذكياء وعدهم اكثر من لغة كاملة، يعني يعبر عن نفسه ويحاور ويكتب ويقرا 3 لغات
مو مجرد حافظين كم كلمة
سريعين الحفظ ، عدهم انتباه وقوة ملاحظة
قدرة على حل المشكلات بحلول ابداعية
يستوعبون اي موضوع حتى لو جديد واول مره يسمعوه
ما اعاني بالمدرسة ولا ادرسهم مجرد متابعة خفيفة
وكل طفل صار مميز بجانب مختلف
مثلا الكبير مميز جدا بالحساب والرياضيات ويحسب كلشي ويتعامل مع الارقام بواقعيه مو مجرد درس وينتهي
يعني من يتعامل مع الفلوس ، من يحسب الوقت
من يقيس الاوزان من يحول اللتر الى مل ... وغيرها من استخدامات الرياضيات بالحياة بشكل واقعي وعملي ومفيد

الطفله الوسط عدها حس فني وجمال بالرسم واللغات وتاليف القصص والانشطه الابداعية
تصنع قصه من الصفر تصميم ولصق ونص ورسم من الورق والاقلام
وتصنع العاب من الورق واللاصق بافكار مختلفه
مثلا مره صنعت موبايل من الورق
مره سوت لعابه من البالون ولبستهة ملابس من الكارتون
ومره صنعت مدينه العاب من الورق

الطفله الصغيره بعد ما برز شخصتيها الخاصة او تميزها لكن ذكائها واضح وسابقة اقرانها من كل النواحي ، حتى بالتعبير عن المشاعر
وعدها قدرات يدويه ممتازة مقارنه بعمرها
وذاكرة ما شاء الله تذكر هواي اشياء واحداث وتعرف تربط بينانها

هاي النتائج من برامج جلين دومان ، بالوقت الي هواي تصورون هو مجرد يتعلم رياضيات وقراءة من وقت
لكن هو هذا اخر هدف وليس اول هدف

اول هدف هو تطوير وتدريب العقل نفسه والي يخلي يظهر على كل طفل بشكل مميز ومختلف ، لان الاطفال يختلفون وبالتالي النتائج تظهر مثل صقل الجوهره الداخلية لكل طفل

تدريب العقل يعني نخلي العقل مرن وذكي ، مو خامل وبليد
واهم شي هو البدأ مبكرا
لان العقل في السنوات الاولى يمتلك اعلى مرونه واعلى قدرة على النمو
ف نستغل هذا الوقت وندرب العقل وبالتالي نحصل كل هاي النتائج واكثر بمجرد ثواني قليلة بالوقت الصحيح من عمر الطفل

ما ننتظر يكبر وبالتالي يصير عنده شخصيته الخاصه وميوله ويشوف مغريات الحياة وبالتالي يصير اصعب نجذبه ، وكذلك تقل المرونه العقلية
وانما نبدي من وقت باعلى مرونه عقلية وباقل وقت مبذول وبالادوات الصح والمنهج الصح ونطوره صح
ان شاء الله اشارك وياكم يومياتي بهذا البرنامج الحلو ❤️
والي تحب تكون معاي ونطبق البرنامج سوه خلي تجهز من الان حتى ننطلق بالرحلة سوه
للعلم اي شي بالحياة يحتاج تشجيع لان البشر يمل ويخمل ف ان شاء الله نشجع سوه حتى نكمل الرحلة 🤩

د.اسماء

تعالوا احجيلكم فد شغله هم بيها معلومه
و هم بيها دلاله على عظيم صنع الخالق :
قصة اكتشاف مادة غريبة من حليب الأم قد تقتل الخلايا السرطانية!
القصة بدأت في التسعينات داخل مختبر بجامعة Lund في السويد، عندما كانت العالمة Catharina Svanborg وفريقها يدرسون فوائد حليب الأم في حماية الأطفال من الالتهابات.
خلال التجارب صار شيء غريب…
لما وضعوا بعض مكونات حليب الأم على خلايا سرطانية في المختبر، لاحظوا أن الخلايا بدأت:
• تنكمش
• تفقد شكلها
• وتموت
بينما الخلايا الطبيعية بقيت تقريبًا سليمة!
بعد تحليل طويل اكتشفوا أن السبب هو بروتين موجود طبيعيًا في حليب الأم اسمه alpha-lactalbumin.
لكن عندما يتغير شكله ويرتبط مع حمض دهني اسمه oleic acid يتكوّن مركب جديد مختلف تمامًا.
هذا المركب سموه:
HAMLET
وهو اختصار لـ
Human Alpha-Lactalbumin Made Lethal to Tumor cells
يعني حرفيًا:
“بروتين من حليب الإنسان تم جعله قاتلًا للخلايا السرطانية”.
المثير للاهتمام أن هذا المركب يستطيع:
• الدخول إلى الخلايا السرطانية
• تعطيل بعض أنظمتها الحيوية
• ودفعها إلى الموت
والأغرب أن تأثيره يبدو أقوى على الخلايا السرطانية من الخلايا الطبيعية.
تمت تجارب صغيرة على البشر أيضًا:
• على بعض الثاليل
• وعلى أورام المثانة
ووجد الباحثون أن الخلايا السرطانية يمكن أن تموت وتُطرح من الجسم.
لكن إلى الآن، هذا المركب ما زال قيد البحث
مع ذلك يبقى مثالًا مدهشًا على كيف يمكن للطبيعة أن تخبئ أسرارًا كبيرة… حتى داخل حليب الأم.
حليب الأم عظيم
و صنع الخالق اعظم
الصوره لجزيئات هاملت و هي تقضي على الخلايا السرطانية
د. سيف سمير البياتي أخصائي طب الأطفال

اكتب هذه المره عن اهميه اللحم بالنسبه للاطفال
و بالأخص الأطفال الرضع تحت عمر سنه
تعرفون يمكن أن نسبه الدم اول ما يجي الطفل للدنيا هي كلش عاليه و تبدي شويه شويه تنزل و طبعا هذا الدم العالي راح يتكسر و ينخزن كحديد بالجسم
و يبدي بحوالي ٤ إلى ٥ اشهر يخلص الحديد من الجسم
و هنا لازم نضيف الحديد
لان اكيد تعرفون انه حتى الحليب المدعم بالحديد همين ما بيه كميه حديد كافيه
و اما اللي يرضعون طبيعيا فيحتاجون اكيد لاضافه الحديد على شكل قطرات بعمر ٤ شهور ١٢٠ يوم
و احنا حارميهم علمود خرافه انه اللحم ما يصير قبل السنه
المهم ما عليكم بالشرح الفوك
.
.

شنو المطلوب دكتور؟
المطلوب هو تزويد الطفل باللحم بعمر ابكر من اللي تعودنا عليه
و قسم من خبراء التغذيه يكولون لازم اول اكله تدخل للطفل هي اللحم
اني رأيي انه اول اكله هي الرز و مشتقاته مثل شوربه الرز و غيرها
و بعدها بحدود ال ٥ إلى ٦ اشهر دخلي اللحم
و اول لحم هو الدجاج و بعدها اللحم الاحمر و اخرها السمك
طبعا اكيد راح يجي سؤال
دكتووووور شون مو ما عنده سنون؟
اكيد باستخدام الخلاط
او تكدرين تسويه بيوريه بعد ما تكسرين اللحم على النار
او اقلها المي مالته
انتبهي طبعا و بكل حذر اذا اكو قطع لا يغص بيها الطفل
ملاحظه : الدود عدوى و اللحم المسكين ماله علاقه بالدود فاللي تكولك شووون مو يصير بيه دود كوليلها عيب هالخرافات
د. سيف سمير البياتي
اخصائي طب الأطفال