Advertising in the Telegram channel «Ethiopian Construction Vacancy & Tender» 03cfa

👉የመኖሪያ ቤት እጥረትን የሚያስወግዱ የፕሪካስት ሕንፃዎች ፈጣን የሆነ የህዝብ ቁጥር መጨመርን ተከትሎ ኢትዮጵያን በመሳሰሉ ሀገራት ከፍተኛ የመኖሪያ ቤት እጥረት እየተከሰተ መሆኑ እሙን ነው፡፡ የሰው ልጅ ከሚያስፈልጉት ሦስት መሠረታዊ አስፈላጊ ነገሮች አንዱ የሆነውን መኖሪያ ቤት ሰዎች ለኑሮ አመቺ በሆነ ቦታ እና ተገቢ በሆነ ወጪ የማግኘት በአለም አቀፍ ደረጃ ስምምነት የተደረገበት መብት መሆኑም ይታወቃል፡፡ ይህንን እጥረት እና ፍላጎት ለማሟላት ከሚያስችሉ የግንባታ ዘዴዎች ውስጥ ተጠቃሹ ደግሞ፦ ቀደም ብለው በተለያዩ የማምረቻ ቦታዎች የሚዘጋጁ ተገጣጣሚ የኮንክሪት የወለል ምንጣፎች፣ ግርግዳዎች እና ቋሚ ማዕዘኖች "ፕሪ ካስት ኮንክሪቶች" ትኩረት ከሚሹ የግንባታ ዘዴዎች በቀዳሚነት የሚቀመጡ ናቸው፡፡ በፕሪካስት ቴክኖሎጂ በፋብሪካ ውስጥ እየተመረቱ፣ በሰለጠነ መንገድ የሚገጣጠሙ የሕንፃ ቁሳቁሶች የመኖሪያ ቤትን እጥረትን በፍጥነት ለመቅረፍ ከሚያስገኙት ተጨማሪ ጠቀሜታዎች እና የአመራረት ዘዴዎች የሚከተሉት በቀዳሚነት ይጠቀሳሉ፡፡ ⏺የጥራት ደረጃን መጨመር እና መጪን መቀነስ ለሕንፃ ግንባታ የሚያስፈልጉ ተገጣጣሚ ኮንክሪቶች የሚዘጋጁት ለቁጥጥር አመቺ በሆኑ ገላጣ ቦታዎች፣ መጠኑ ባልተዛባ እንደ ሲሚንቶ፣ ብረት፣ ውሃ በመሳሰሉ የግንባታ ቁሳቁሶች ከመሆናቸውም ጋር በተያያዘ አላስፈላጊ ብክነት ወይም ዕጥረትን በማስወገድ ወጪን ይቀንሳሉ፡፡ ኮንክሪቶቹ የሚዘጋጁት ከሰው ፍላጎት እና ተጽዕኖ በጸዳ፣ በፕሮግራም በሚታዘዝ (አውቶማቲክ) የማምረት ዘዴ በመሆኑ የተፈለገውን ምርት በተፈለገው ፍጥነት በማምረት የጊዜ ብክነትን ያስወግዳሉ፡፡ በተለመደው የሕንፃ ግንባታ ዘዴ በግንባታ ሳይት ላይ የተለያየ ቅርፅ ያላቸው ዲዛይኖችን ለመሥራት የሚያስፈልጉ ውስብስብ የእንጨት እና የብረት ድጋፎችን በማስወገድ ለሚፈለገው ቅርፅ፣ ቅርፅ ማውጫ ሞልድ በማዘጋጀት የተፈለገውን ዲዛይን በፍጥነት ለማምረት ስለሚያስችል የባለሙያን ወጪን ይቀንሳል። ⏺አስተማማኝ የሥራ ዕድል ይፈጥራል አንድ የፕሪካስት ማምረቻ ድርጅት ወደ ማምረት ሂደት የሚገባው አንድ አስገንቢ ድርጅት ለሚያሠራው ሕንፃ የሚያስፈልገውን የሚገጣጠም የኮንክሪት መጠን እና ዲዛይንን መነሻ በማድረግ ቀደም ብሎ የውል ስምምነት በመፈረም ነው፡፡ ከዚህ የተነሳ አምራች ድርጅቱ ግንባታው እስኪጠናቀቅ ድረስ የማያቋርጥ አስተማማኝ የሥራ ዕድል እንዲፈጠርለት ያደርጋል፡፡ ⏺የኮንክሪት እና የኃይል ወጪን ይቀንሳል በፕሪካስት የሚገነቡ ሕንፃዎች ትርፍ የሆነ ሙቀትን በማመቅ በዝግታ ወደ ከባቢ አየር የሚለቀቀውን በካይ ነገር እንዲወገድ በማድረግ፣ በሕንፃ ላይ የሚፈጠረውን አላስፈላጊ ክብደት ወይም ጭነት በማስወገድ፣ በተለመደው መንገድ በሳይት ላይ ከሚገነቡ ሕንፃዎች ከ50 በመቶ የበለጠ የኮንክሪት እና የኃይል ወጪን ይቀንሳሉ፡፡ ይህን ብቃት እንዲላበሱ ከሚያደርጋቸው ውስጥ ለምሳሌ፣ የተለያዩ ፎቅ ባላቸው ሕንፃዎች ለወለል የሚዘጋጁ ውስጣቸው ክፍት በሆነ ብሎኬት እና ኮንክሪት የሚዘጋጁ ተገጣጣሚ የኮንክሪት ምንጣፎች ከተለመደው ግንባታ ከ50 እስከ 60 በመቶ ክብደታቸው በቀነሰ እና ጥራታቸው በተጠበቀ እንደ ሲሚንቶ፣ ብረት እና የመሳሰሉት የግንባታ ቁሶች የሚዘጋጁ ናቸው፡፡ ከዚሁ በተጨማሪ፣ እንደየአስፈላነቱ ግንባታው በሚካሄድበት ቦታ ያለውን የከባቢ አየር ድምጽ መስተጋባት፣ የመሬት ርደት ወዘተን መነሻ አድርገው ስለሚመረቱ አላስፈላጊ የሆነ የኮንክሪት እና የኃይል ወጪን በመቀነስ የበለጠ ዕድሜ እና ጥንካሬን እንዲኖራቸው የሚያደርግ ብቃት የጠላበሱ ያደርጋቸዋል። ⏺ለዕድሳት፣ ለግንባታ እና ለማጓጓዝ የሚያስፈልገውን ጊዜ እና ወጪን ይቀንሳል በፕሪካስት ኮንክሪት የሚገነቡ ሕንፃዎች ከሚያስፈልጋቸው ቁሳቁሶች ውስጥ በብረት እና በኮንክሪት የሚዘጋጁ ተገጣጣሚ ወለሎች፣ በአራት ማዕዘን እና በተፈለገው ቅርጽ የሚዘጋጁ ጠፍጣፋ የኮንክሪት ወለሎች ተገጣጣሚ ግድግዳዎች፣ የቋሚ እና የአግድም ማዕዘን የኮንክሪት ፍሬሞች ይገኙባቸዋል፡፡ እነዚህ ተገጣጣሚ የግንባታ ቁሳቁሶች የሚዘጋጁት ሳይት ላይ በቀላሉ ሊገጣጠሙ በሚችሉ እና ለማጓጓዝ አመቺ በሆነ መጠን እና ዲዛይን ነው፡፡ ከዚህ ጋር በተያያዘ፣ ሳይት ላይ ጥሬ ቁሶችን በማቅረብ እና በተለመደው መንገድ ለመገንባት የሚያስፈልጉ የቁሳቁስ ማጓጓዣ፣ በኮንክሪት ሙሌት የሚወጣ የጉልበት እና የመሳሪያ አቅርቦት ወጪን ይቀንሳሉ፡፡ ክፍት የሆኑት የኮንክሪት ምንጣፎች እስከ 20 ሜትር የሚረዝም ቁመና የተላበሱ በመሆናቸው በተለመደው መንገድ ከ6 እስከ 10 ሜትር ብቻ በሚረዝም ፓሌት (የብረት ማዕዘን) እየተገጣጠመ የሚሟላ የኮንክሪት ማዕዘን ለማዘጋጀት የሚያስፈልግ የጉልበት፣ የግንባታን ወጪን በመቀነስ ግንባታው በፍጥነት እንዲከናወን በማድረግ ያላቸውን ጠቀሜታ የጎላ ነው፡፡ @etconp

614